Grunur um fimmta tilfellið – Í viðbragðsstöðu um allt land

Ákveðið hefur verið að grípa til ýtrustu varúðarráðstafana eftir að grunur vaknaði í gærkvöldi um fimmta tilfelli mislinga hér á landi. Þegar hafa fjórir greinst með mislinga, tvö börn og tveir fullorðnir. Sá fyrsti smitaðist erlendis en hinir í innanlandsflugi á Íslandi um miðjan febrúar.

Á fundi sóttvarnalæknis og heilbrigðisyfirvalda á Austurlandi, höfuðborgarsvæðinu sem og Landspítala í morgun, var ákveðið að hvetja forgangshópa á Austurlandi og höfuðborgarsvæðinu til að þiggja bólusetningu við mislingum. Forgangshóparnir ná til allra þeirra sem eru óbólusettir og fæddir á tímabilinu 1. janúar 1970 til 1. september 2018, eða á aldrinum 6 mánaða til 49 ára. Þá eru þeir sem hafa verið útsettir fyrir mislingasmiti, ásamt þeirra nánasta umgangshópi, einnig beðnir að þiggja bólusetningu við sjúkdómnum sem fyrst, eða frá og með deginum í dag.

Boðið verður upp á opnar bólusetningar fyrir austan og á höfuðborgarsvæðinu fyrir þessa hópa. Staðsetningarnar má sjá á heimasíðu Heilbrigðisstofnunar Austurlands og Heilsugæslu höfuðborgarsvæðisins.

Þeir sem hafa verið bólusettir eða fengið mislinga þurfa ekki frekari bólusetningu. Flestir sem fæddir eru fyrir 1970 hafa fengið sjúkdóminn og eru því ekki í forgangi í bólusetningu, sem og einstaklingar með sögu um eina bólusetningu en hægt verður að bjóða þeim bólusetningu síðar. Þá hafa börn yngri en sex mánaða ekki gagn af bólusetningu við mislingum, að því er fram kemur í tilkynningu Landlæknis.

Sóttvarnalæknir hefur upplýst umdæmis- og svæðislækna sóttvarna um land allt um stöðu mála og eru þeir í viðbragðsstöðu til að hefja bólusetningarátak ef tilfelli mislinga koma upp í öðrum landshlutum.

Gripið til ýtrustu varúðarráðstafana vegna mislinga