Nýtt náms- og stuðningsver var nýverið opnað í Fjölbrautaskóla Vesturlands á Akranesi. Námsverið er hluti af verkefni sem styrkt var af Mennta- og menningarmálaráðuneytinu í þeim tilgangi að sporna við brotthvarfi úr námi. Guðrún Sigríður Guðmundsdóttir, náms- og starfsráðgjafi við skólann, á hugmyndina að námsverinu og hefur hún séð um að koma því á laggirnar. „Í mínu starfi er maður alltaf að leita leiða til að bæta þjónustuna og gera meira fyrir nemendur og námsverið er hluti af því,“ segir Guðrún þegar Skessuhorn ræddi við hana og Írisi Björgu Jónsdóttur skóla- og geðhjúkrunarfræðing um stuðningsþjónustu nemenda við FVA.

Guðrún og Íris vinna náið saman að því að aðstoða nemendur við ýmis mál sem kunna að koma upp hjá þeim bæði hvað varðar nám eða í persónulegu lífi. Íris sér um almennan stuðning fyrir nemendur með kvíða, þunglyndi eða annan heilsufarsvanda auk þess sem hún er tengiliður nemenda við heilsugæslustöðina. Íris starfar hjá Heilbrigðisþjónustu Vesturlands á Akranesi og er með viðveru í FVA eftir hádegi alla þriðjudaga og fimmtudaga. „Þá geta nemendur leitað til mín hingað og ég aðstoðað þá, bæði hvað varðar andleg vandamál og líkamleg eins og veikindi eða meiðsli,“ útskýrir Íris. „Mín þjónusta gæti reynst sérstaklega vel fyrir nemendur sem búa á heimavistinni og hafa ekki foreldri til að leita til með læknisaðstoð. Ég get þá aðstoðað nemendur og vísað þeim áfram til læknis ef þörf er á,“ segir Íris og Guðrún bætir því við að þær séu einnig báðar tilvísunaraðilar til sálfræðings sem starfar hjá HVE á Akranesi ef nemendur þurfi á aðstoð sálfræðings að halda.

Vill gera enn meira fyrir nemendur

Markmið náms- og stuðningsversins er að auka þjónustu við nemendur og veita þeim meiri stuðning við námið. Þangað geta nemendur farið bæði til að finna næði til heimanáms og til að fá aðstoð kennara. Tvisvar í viku verða kennarar í námsverinu í klukkutíma í senn að aðstoða nemendur, stærðfræðikennari, enskukennari og íslenskukennari. „Á öðrum tímum verður ekki starfsmaður á svæðinu en nemendur geta alltaf leitað til mín eftir aðstoð. Það er mín von að geta aukið þjónustuna með tímanum og þá hafa námsverið opið allan daginn alla daga og að þar verði alltaf starfsmaður innan handar fyrir nemendur. Tíminn verður þó að leiða í ljós hvort það verði að veruleika,“ segir Guðrún en bætir því við að hún sé bjartsýn fyrir framhaldinu. Aðstaðan í námsverinu er mjög góð en þar er tafla, borð, stólar, hægindastólar, lampi og teppi. „Nemendur geta farið þangað og fengið næði til að læra, hvort sem það er að vinna verkefni eða hafa það notalegt undir teppi að lesa kjörbók. Það eru þegar nokkrir nemendur farnir að nýta sér þjónustuna og við Íris erum duglegar að hvetja fleiri til þess. En það er enn stutt síðan námsverið var opnað og ég bind vonir við að sjá fleiri nemendur þar með tímanum,“ segir Guðrún. „Við trúum því að með auknum stuðningi og aðstoð við nemendur til að takast á við námið geti bætt námsárangur og virkni auk þess sem brottfall minnki,“ segir Guðrún og Íris tekur undir.

Námsverið er opið frá kl. 13:05-15:55 mánudaga og föstudaga, frá kl. 9:40-12:30 þriðjudaga og fimmtudaga og allan daginn á miðvikudögum. Á miðvikudögum frá klukkan 14:55-15:55 verða stærðfræðikennari og íslenskukennari á staðnum með námsaðstoð og á fimmtudögum frá kl. 9:40-10:40 er enskukennari með viðveru.

Hafa opnað náms- og stuðningsver í FVA