Aðstandendur Minningarsjóðs Einars Darra hafa nú farið af stað með uppfræðsluerindi fyrir nemendur í 7.-10. bekk í grunnskólum landsins og fyrir foreldra og kennara grunnskólabarna. „Við viljum hafa þetta valdeflandi fræðslu þar sem við gefum foreldrum, kennurum og krökkum verkfæri til að bregðast við með upplýstum hætti þegar þau eru komin í aðstæður þar sem er verið að misnota lyf eða fíkniefni. Hvort sem það er að geta sagt nei eða að þora að láta vita ef þau sjá eða vita af einhverjum nota þessi lyf. Oft halda krakkar að þau séu að svíkja vini sína með því að segja frá en raunin er að þau gætu verið að bjarga lífi viðkomandi,“ útskýrir Bára Tómasdóttir móðir Einars Darra í samtali við Skessuhorn.

„Krakkarnir vita ekki hversu hættulegt þetta getur verið og einn nemandi sagði við mig eftir að hafa hlustað á uppfræðsluerindið að hann vissi ekki að maður gæti dáið við að fikta. Við viljum gefa þessum krökkum verkfæri svo þau þori sjálf að bregðast við í þessum aðstæðum Við vitum að svona fræðsla mun aldrei ná til allra og þess vegna viljum við valdefla þá sem fræðslan nær til svo þeir krakkar segi frá og bjargi kannski þeim sem fræðslan nær ekki til,“ segir Bára og bætir við að þau fari einnig inn á geðheilbrigðismál í fræðslunni og þá sérstaklega kvíða. „Við höfum miklar áhyggjur af hversu mörg börn og ungmenni glími við kvíða og bendum krökkunum á að það er alltaf til lausn og leiðir fyrir alla.“

Mikil vinna lögð í uppfræðsluerindið

Mikil vinna var lögð í Eitt líf uppfræðsluerindið en að því standa Bára, Andrea Ýr Arnarsdóttir og Aníta Rún Óskarsdóttir, systur Einars Darra, auk Kristjáns Ernis Björgvinssonar, vinar Einars Darra og fíkils í bata. Við úrvinnslu uppfræðsluerindisins var stuðst við rannsóknir og fyrri reynslu aðstandenda Einars Darra frá því þau héldu sambærilegt erindi fyrir nemendur í framhaldsskólum landsins. „Við leituðum líka mikið til unga fólksins og fræðafólks og vorum til að mynda með rýnihóp sem var samsettur af ungu fólki, óvirkum fíklum, lækni, félagsráðgjafa og fleiri fræðimönnum. Við gerðum líka skoðanakönnun á netinu sem rúmlega 500 ungmenni á aldrinum 15-22 ára tóku þátt í. Þetta notuðum við til að sjá hvað myndi ná til unga fólksins og hvað það myndi hlusta á,“ segir Bára.

Fyrsta uppfræðsluerindið var haldið í byrjun mánaðarins í Heiðarskóla í Hvalfjarðarsveit, þar sem Einar Darri bjó. Einnig er búið að halda erindi í Grundaskóla á Akranesi og í framhaldinu verður farið með uppfræðsluerindið í grunnskóla um allt land. „Við erum nánast fullbókuð út skólaárið en við erum að fara á Neskaupsstað, Reykjavík, Borgarbyggð og víðar. Við erum fyrst með fræðslu fyrir kennara og foreldra deginum áður en við tölum við krakkana. Þetta er svo bæði kennarar og foreldrar verði tilbúnir að ræða við krakkana og svara spurningum þeirra eftir þeirra fræðslu,“ segir Bára og bætir því við að einnig verði haldið erindi fyrir eldri borgara í Hvalfjarðarsveit. „Þetta er eitthvað sem allir þurfa að heyra og ekki síst eldra fólk. Lyfjaskápurinn hjá afa og ömmu getur verið mjög hættulegur, en þetta er eitthvað sem krakkarnir hafa sjálfir bent okkur á,“ segir Bára.

Valdeflandi fræðsla gegn misnotkun á lyfjum og fíkniefnum