Um 250 manns sóttu opinn fund sem Kristján Þór Júlíusson, sjávarútvegs- og landbúnaðarráðherra, hélt í gærkvöldi í félagsheimilinu Þingborg á Suðurlandi. Tilefni fundarins var frumvarp sem ráðherrann hefur lagt fram og birt hefur verið í samráðsgátt stjórnvalda varðandi innflutning á m.a. ófrystu kjöti. Með frumvarpinu telur ráðherra sig vera að bregðast við dómum Hæstaréttar Íslands og EFTA-dómstólsins. Á fundinum fór ráðherra ítarlega yfir tilurð málsins og viðbrögð stjórnvalda en í kjölfarið gafst fundarmönnum tækifæri til að beina spurningum til ráðherra. Þátttaka á fundinum bendir eindregið til að bændur hafa þungar áhyggjur af áhrifum frumvarpsins fyrir starfsstétt sína, sjúkdómavarnir og samkeppni.

„Mér finnst vera að skapast meiri skilningur á þeirri staðreynd að stjórnvöld þurfa að bregðast við þeirri stöðu sem uppi er,“ sagði ráðherra. „Jafnframt að allir aðilar; hvort sem það eru bændur, stjórnvöld eða aðrir, sameinist í því verkefni að setja upp öflugar varnir til hagsbóta fyrir íslenskt samfélag. Um leið þurfum við að sameina krafta okkar í því að draga fram óumdeilda kosti innlendrar matvælaframleiðslu umfram það sem innflutt er þannig að íslenskar vörur verði fyrsti kostur allra neytenda. Ég er sannfærður um að þetta mun takast,“ sagði Kristján Þór á fundinum.

Ráðherrann mun á næstu dögum halda fleiri fundi um landið til að kynna frumvarpið. Meðal annars er fyrirhugaður fundur á Hótel Hamri í Borgarnesi mánudaginn 4. mars klukkan 19:30.

Bændum og öðrum hagsmunaaðilum er jafnframt bent á að frumvarp ráðherrans er nú til umsagnar í Samráðsgátt stjórnvalda og rennur út frestur til að skila inn athugasemdum miðvikudaginn 6. mars nk.

Sunnlenskir bændur fjölmenntu á fund vegna innflutnings landbúnaðarvara