Sigurgeir Sindri Sigurgeirsson hefur óskað eftir því að stíga til hliðar sem formaður Bændasamtaka Íslands. Sindri hefur gegnt starfinu frá árinu 2013, en tekur í apríl við nýju starfi svæðisstjóra Arion banka á Vesturlandi með aðsetur í Borgarnesi. Í ljósi þess mun hann láta af öllum trúnaðarstörfum fyrir samtök bænda. Frá þessu er greint í tilkynningu frá Arion banka.

„Um þessar mundir er ég búinn að starfa að félagsmálum bænda í um tuttugu ár. Þetta hefur verið lærdómsríkur tími og gríðarmiklar breytingar orðið. Þau sex ár sem ég hef verið formaður Bændasamtakanna hafa verið annasöm og krefjandi en umfram allt skemmtilegur tími. Oft hefur blásið hressilega á móti í umræðu um landbúnaðarmál en alltaf er jafn ánægjulegt að sjá hvað velvild almennings er mikil gagnvart íslenskum bændum,“ er haft eftir Sindra á vef Bændasamtakanna. „Á þessum tíma hef ég kynnst mikið af fólki úr öllum greinum samfélagsins, með mismunandi skoðanir á öllu því sem tengist landbúnaði. Öllu þessu fólki vil ég þakka gott samstarf og hressileg skoðanaskipti. Samstarfsfólki mínu og framvarðasveit landbúnaðarins þakka ég kærlega fyrir frábært samstarf.“

Við formannsstarfinu í BÍ tekur Guðrún Tryggvadóttir, bóndi í Svartárkoti í Bárðardal í Suður-Þingeyjarsýslu. Hún tekur við starfinu föstudaginn 1. mars næstkomandi, en hún er núverandi varaformaður samtakanna. Guðrún verður fyrsta konan til að gegna formennsku í Bændasamtökum Íslands, allt frá því þau voru stofnuð undir nafninu „Suðuramtsins húss- og bústjórnarfélag“ árið 1837. Bændasamtökin í núverandi mynd voru stofnuð árið 1995 í kjölfar sameiningar Stéttarsambands bænda og Búnaðarfélags Íslands.

Guðrún er kennari að mennt en rekur sauðfjárbú í Svartárkoti með systur sinni og fjölskyldum þeirra. Þar er einnig rekið menningar- og fræðslusetur, auk ferðaþjónustu að Kiðagili í sömu sveit. Við formannaskiptin verður einnig breyting á stjórn samtakanna. Guðrún Lárusdóttir, bóndi í Keldudal í Hegranesi og formaður Búnaðarsambands Skagfirðinga, tekur sæti í aðalstjórn frá 1. mars.

Formannsskipti að verða hjá Bændasamtökum Íslands