Rótarýdagurinn verður sem fyrr haldinn hátíðlegur laugardaginn 23. febrúar næstkomandi. Dagurinn er á alþjóðavísu nýttur til að vekja athygli á starfi hreyfingarinnar og verkefnum sem hún beitir sér fyrir. Þórir Páll Guðjónsson er forseti Rótarýklubbs Borgarness. Klúbburinn býður íbúum og öllum áhugasömum á kynningarfund næstkomandi laugardag á Hótel Borgarnesi. Þar mun fjölmiðlakonan Sigríður Arnardóttir flytja erindi sem nefnist „Laðaðu til þín það góða,“ þar sem hún fjallar um samskiptatækni og hvernig halda má í orku og jákvæðni jafnvel einnig þegar á móti blæs.

Á góðri leið með að útrýma lömunarveiki

Meðal helstu verkefna Rótary hreyfingarinnar á heimsvísu er Polioplus sem hún hefur staðið fyrir allt frá 1984. „Eftir 35 ára þrotlaust starf er Rótaryfólk nú langt komið að útrýma lömunarveiki. Veikin finnst nú einungis í tveimur eða þremur löndum, en var áður en átakið hófst útbreiddur og skæður sjúkdómur víða um lönd,“ segir Þórir Páll. Félagsmenn sinna ekki sölustarfi af neinu tagi, en leggja gjald í Rótarýsjóð, sem fjármagnar meðal annars Polarplus verkefnið. Þórir Páll segir að markmið Rótarýdagsins næstkomandi laugardag sé einnig að kynna það starf sem Rótarýklúbbur Borgarness stendur fyrir, vekja athygli á skemmtilegum félagsskap og laða til sín nýja félaga. „Klúbbar eins og okkar þurfa stöðugt að vera að endurnýja sig. Við reyndar búum vel, erum með 26 starfandi félaga, en viljum gjarnan fjölga í hópnum,“ segir Þórir Páll.

Margt borið á góma

Rótarýklubbur Borganess var stofnaður 1952 og hefur síðan starfað með blóma. „Í gegnum tíðina hafa nokkur verkefni verið áberandi hjá okkur. Til dæmis komum við upphaflega að ritun Sögu Borgarness, höfum sinnt gróðursetningu, lagt göngustíga meðal annars við Borg á Mýrum og sinnt starfsfræðslu fyrir grunnskólanemendur í 10. bekk grunnskólanna í héraðinu. Síðasttalda verkefnið hefur raunar verið óslitið í 26 ár og ekkert lát á því. Við höfum þannig stutt við það að nemendur kynnist starfandi fyrirtækjum í héraði og oft hefur slík vettvangsferð kveikt áhuga ungs fólks á að starfa í viðkomandi grein,“ segir Þórir Páll.

Á fundum Rótarýklúbbs Borgarness er ætíð meginþema þar sem mál eru kynnt. „Það hafa mörg málefni borið á góma á fundum okkar í gegnum tíðina. Til dæmis má nefna að fyrst var imprað á brú yfir Borgarfjörð og gerð friðlands í Einkunnum á fundum Rótarýklúbbs Borgarness, svo ég taki dæmi. Það einkennir félagsskap okkar að í klúbbnum er fólk úr ýmsum starfsgreinum. Það eykur breiddina og gerir starfið skemmtilegra. Á öllum fundum okkar er meginþema. Til marks um ólík umræðuefni höfum við nýlega fengið til okkar Vilborgu Pólfara, rætt var um líffæragjafir á opnum fundi, nytjaskógrækt var kynnt, Vatnajökulsþjóðgarður, Rússland og áfram mætti telja.“

Engin leyndarmál

Þórir Páll segir að klúbburinn hafi í gegnum tíðina beitt sér fyrir afmörkuðum söfnunarverkefnum og nefnir Lucas hjartahnoðtæki í sjúkraflutningabíla sem dæmi. „Við viljum ætíð leggja góðum málefnum í samfélaginu lið. Kjörorð okkar hreyfingar er; „Þjónusta ofar eigin hag,“ það er að þjóna öðrum án þess að hugsa um eigin hag. Þannig er hugsunin á bakvið Rótarýklúbbinn fyrst og fremst velvild gagnvart samfélaginu. Hjá okkur eru heldur engin leyndarmál, við bjóðum gesti velkomna á fundi okkar og leggjum okkur fram um að fá áhugverða fyrirlesara hverju sinni til að gera fundina í senn skemmtilega og fræðandi. „Ég vil að endingu hvetja sem flesta til að mæta á fundinn okkar næstkomandi laugardag klukkan 14 á Hótel Borgarnesi, hlýða á fræðandi erindi Sirrýjar og þiggja kaffiveitingar,“ segir Þórir Páll Guðjónsson að endingu.

Íbúum boðið til kynningarfundar á Rótarýdeginu