Ingibjörg Guðjónsdóttir, handverkskona á Akranesi, heldur bútasaumssýningu á Bókasafni Akraness, dagana 8. febrúar til 8. mars næstkomandi. Ingibjörg er fædd 1949 og uppalin á Arkarlæk í Skilmannahreppi. Hún flutti til Akraness 16 ára gömul, þar sem hún hefur verið búsett síðan. Ingibjörg, sem alltaf er kölluð Inga, er sjúkraliði og vinnur á Heilbrigðisstofnun Vesturlands á Akranesi en hún er gift Jóni Ármanni Einarssyni.

Á sýningunni á Bókasafninu sýnir Inga fjölbreytt handverk, handunnin teppi og vélsaumuð. Hún teiknar sjálf upp og litar eigin mynstur og segist fá mikla ánægju út úr því að skapa allt frá grunni. Á sýningunni gefur að líta fyrsta teppið sem Inga saumaði árið 1986. Síðan þá hefur hún saumað ógrynni teppa, fjölbreytt að litum og formi.

Inga var lengi í saumaklúbbnum Skagaquilt á Akranesi, en þegar fækkaði í hópnum á Skaganum færði hún sig yfir í Skraddaralýsnar, bútasaumshóp í Hvalfjarðarsveit. Skraddaralýs hittast reglulega í félagsheimilinu Fannahlíð.

Þetta er 25. sýning Ingu, en hún hefur tekið þátt í fjölmörgum samsýningum auk þess að sýna ein sitt handverk. Fyrsta sýning hennar var árið 1990, heima í stofu. Verk hennar hafa farið víða og var m.a. verk eftir hana valið af Íslenska bútasaumsfélaginu árið 2006 til að taka þátt í samsýningu sem fór víða um Evrópu, farandssýning sem stóð yfir í þrjú ár. Auk þess tók hún þátt í Quiltsýningu í Birmingham fyrir hönd Íslenska bútasaumsfélagið árið 2014.

„Sýningin verður opið á afgreiðslutíma Bókasafnsins, virka daga kl. 12-18 og á laugardögum kl. 11-14. Allir eru hjartanlega velkomnir við opnun sýningarinnar föstudaginn 8. febrúar kl. 16-18,“ segir í tilkynningu frá Bókasafni Akraness.

Líf í tuskunum hjá Ingu Guðjóns