Klukkan 17 í dag verður í verslunarmiðstöðinni við Smiðjuvelli á Akranesi opnuð samsýning nemenda á þriðja ári við umhverfisskipulagsbraut LbhÍ á Hvanneyri og nemenda á þriðja ári í arkitektúr við hönnunar- og arkitektúrdeild Listaháskóla Íslands. Efnt er til þessarar sýningar í samstarfi við Akraneskaupstað enda verkin sem til sýnis verða tengd Akranesi, einkum Sementsreitnum sem nú gengur í gegnum gríðarlegar breytingar.

Námskeiðið, Arkitektúr og skipulag (12 Ects) er kennt á þriðja ári á umhverfisskipulagsbraut Landbúnaðarháskóla Íslands. Námskeiðið byggist á því að nemendur kynnist hinum þverfaglegu þáttum sem unnið er með við gerð deili- og rammaskipulags. Nemendur vinna að einu raunverulegu verkefni yfir alla önnina og var verkefnið í ár hönnunartillaga fyrir Sementsreitinn á Akranesi. „Nálgun nemenda byggðist fyrst upp á því að finna staðrandann á svæðinu þar sem þau nýttu myndbandstöku til miðlunar. Þá var gerð skráning á legu svæðisins og greining þar sem meðal annars var rýnt í Aðalskipulagið. Úr því komu einskonar niðurstöður með áskorunum og tækifærum fyrir svæðið. Þriðji hlutinn var hugmyndavinna sem er rökstudd með fyrri þáttum. Áfram fengu svo nemendur hönnunarforsendur um það hversu marga fermetra af atvinnu- og íbúðarhúsnæði þau þyrftu að koma fyrir á svæðinu. Í síðasta hluta verkefnisins gerði svo hver nemandi hönnunartillögu fyrir svæðið byggt á fyrrnefndum þáttum. Hönnunartillagan var kynnt á veggspjöldum og með líkönum.

Viðfangsefni haustannar hjá 3. árs nemum í arkitektúr við Listaháskóla Íslands var m.a. að rannsaka þau áhrif og skilgreina ný tækifæri sem verða til við umpólun á grundvallarstoðum samfélags. Akranesbær var valinn sem viðfangsefni verkefnisins, verandi lifandi og fjölbreytt samfélag á útjaðri þéttbýlissvæðis höfuðborgarinnar. Rótgróið sveitarfélag sem á sér kraftmikla iðnaðarsögu, en stendur nú á tímamótum.

Í tilkynningu segir aðAkranes hafi löngum verið skilgreindur sem útgerðarbær, en hýsti auk þess sementsverksmiðju sem hafði afgerandi áhrif á samfélagsgerð, efnahagsafkomu og efniskennd bæjarins. Nú, við niðurrif sementsverksmiðjunnar, falla til um 15.000 rúmmetrar af steypu og 2.000 tonn af stáli – hráefnismassi í tilvistarkreppu. „Akranes stendur því á tímamótum sem holdgerist meðal annars í stórskornu niðurrifi sementsverksmiðjunnar. Á slíkum tímamótum eru tækifæri til endurskilgreiningar. Tækifæri til að blanda saman ólíkum þáttum með það fyrir augum að þróa nýja eiginleika, kafa dýpra og finna hið óvænta.“

Á sýningunni verða til sýnis nokkur verkefni, sem höfðu það að markmiði að hleypa nýju lífi í jarðveginn og gefa hugmynd um þá óvæntu möguleika sem geta sprottið upp við slíka umpólun.

Sýningin verður opin til 14. febrúar.

Samsýning um arkitektúr og Sementsreit opnuð á Akranesi