Heiðrún Bjarnadóttir í Borgarnesi fór af stað með viðburð síðastliðið haust sem hún kallar „Borgarnes borðar saman“. Íbúar geta þá hist yfir einni máltíð í mánuði og borðað saman án tilstands eða fyrirhafnar. Hugmyndina fékk Heiðrún þegar hún bjó í Danmörku en þar tíðkast að fólk hittist í félagsheimilum og borði saman kvöldmat. Sjálfboðaliðar taka þá að sér að elda matinn og allir hjálpast að við frágang. Fyrsti viðburður Borgarnes borðar saman var í nóvember í safnaðarheimilinu og voru það sjálfboðaliðar frá Rauða krossinum og kokkalið B59 sem sáu um matinn. „Við fengum strax mjög góðar viðtökur hér í bænum og það myndaðist heimilisleg og góð stemning á fyrsta viðburði,“ segir Heiðrún í samtali við Skessuhorn. Annar viðburðurinn var í hádeginu á sunnudegi skömmu fyrir jól en þá tók Hótel Hamar að sér að sjá um matseld. „Þá komu 70 manns og borðuðu jólamat saman. Það gladdi mikið að sjá þennan fjölda svona rétt fyrir jól þegar jólastressið er oft mikið,“ segir Heiðrún.

Hugsað til að auðvelda fólki

Næst ætlar Borgarnes að borða saman á Landnámssetrinu fimmtudaginn 31. janúar. Heiðrún leggur mikla áherslu á að viðburðurinn er hugsaður til að auðvelda fólki lífið og fá íbúana til að hittast og eiga góða stund saman. „Það þarf ekkert tilstand heldur getur fólk bara mætt eins og það kemur heim úr vinnunni. Hugmyndin er að þetta eina kvöld í mánuði þurfi fólk ekki að hugsa um eldamennsku og geti bara slakað á,“ útskýrir Heiðrún og hvetur svo íbúa til að fá með sér nágranna, vinnufélaga eða aðra sem gætu notið góðs af. „Það væri gaman ef þeir sem eru til dæmis að vinna með útlendingum, aðkomufólki eða fólki sem á lítið tengslanet í Borgarnesi að bjóða með sér. Þetta væri frábær vettvangur fyrir fólk að kynnast og komast inn í samfélagið. Þetta er líka sniðugt fyrir þá sem búa einir en langar að borða með einhverjum. Það eru allir velkomnir,“ segir Heiðrún og bætir því við að í fyrstu tvö skiptin sem Borgarnes borðaði saman kom mjög skemmtileg blanda af fólki og höfðu allir gaman af.

Hægt er að nálgast frekari upplýsingar og fylgjast með viðburðum inn á Facebook síðunni Borgarnes borðar saman. Mikilvægt er að senda tölvupóst á borgarnesbordarsaman@gmail.com til að skipuleggjendur viti um fjölda.

Borgarnes borðar saman í þriðja sinn