Á Sögulofti Landnámsseturs Íslands í Borgarnesi var í gærkveldi frumsýndur einleikurinn Farðu á þinn stað, minningar Theodórs Kristins Þórðarsonar, í leikstjórn Geirs Konráðs Theodórssonar. Sjálfur kynnir höfundurinn og eini leikarinn í sýningunni verkið sem sjálfsævilegan einleik þar sem ferðast er allt frá Kínahverfinu í Borgarnesi og fram á Ystu Nöf þar sem hann nú býr ásamt Maríu Erlu Geirsdóttur eiginkonu sinni. Verk þetta byggir á minningum Tedda allt frá uppvaxtarárunum í Borgarnesi; forfeðrunum og frændgarðinum gerð góð skil með sýnilegri væntumþykju. Blandað er inn í nokkra sögurhringi þáttum úr starfi og leik, kryddað með frásögnum af litríkum samferðarmönnum og drepið jafnvel á óupplýst (saka)mál í heimabænum. „Þegar við hættum að taka eftir skrítnu kvistunum sem lita samfélagið sem við búum í, er það vegna þess að við erum sjálfir orðnir hluti af þeim,“ sagði Theodór þegar hann vitnaði í samtal sem hann átti eitt sinn við Einar Ingimundarson málara.

Handrit og uppsetning þessarar sýningar er útpælt og aldrei í tæplega tveggja tíma sýningu leiddist áhorfendum. Þvert á móti var mikið hlegið og oft fór ánægjukliður um salinn þegar ljósmyndir af gengnum vinum birtust á skjánum. Teddi hefur alla tíð verið liðtækur ljósmyndari og myndirnar sem hann hefur tínt til krydda frásögnina lífi og hjálpa mikið við að færa áhorfendur til baka í huganum.

Lífshlaup Theodórs er fjölbreytt og af mörgu að taka hjá manni sem ætíð hefur ræktað sagnalistina. Hann sem pjakkur ólst upp í litríku samfélagi sem var allt í kringum bæinn Dal, lærði rennismíði á yngri árum en gekk síðar í lögregluskólann og gerði að ævistarfi. En þau voru fjölmörg aukaverkin sem hann hefur tekið að sér. Var meðal annars fréttaritari Moggans, dyravörður á hótelinu, liðtækur í leikstarfi, gerði út bát og stofnaði flugklúbb. Teddi hefur því sífellt verið á ferð og flugi og í áranna rás safnað aldeilis ótrúlegu magni af minningum sem í verkinu eru dregnar fram þannig að úr verður mögnuð frásögn, skemmtileg, laus við tilgerð og sem engan meiðir. Vænst af öllu þótti mér um hversu hlýlega hann sagði frá vinum sínum Sveini M Eiðssyni og Júlíusi Axelssyni, fólkinu á Grjóti, Steina Jóru og mörgum fleiri. Fólki sem fetaði ekki endilega sömu slóðir og aðrir, en bjó yfir hæfileikum sem gerðu það ódauðlegt í minningunni.

Farðu á þinn stað, í flutningi Tedda löggu, er tvímælalaust eitt heilsteyptasta og skemmtilegasta verk sem sett hefur verið á fjalirnar í seinni tíð. Að mínu áliti er það beinlínis skylda allra sem eiga rætur í Borgarnesi og héraðinu öllu að sjá þessa mögnuðu sýningu. Því er að mínu viti hófstillt áætlun Tedda um alls fimm sýningar á verkinu, þegar fokin út í veður og vind.

-mm

Farðu á þinn stað – frumsýning á Söguloftinu