Vegfarendur sem daglega aka í gegnum Hvalfjarðargöng hafa tekið eftir að rykmengun í Hvalfjarðargöngum hefur aukist upp á síðkastið. Velta þeir fyrir sér hvort ástæðan sé aukinn flutningur fokgjarnra jarðefna um göngin, eða hvort Vegagerðin hafi dregið úr notkun blásara sem ætlað er að viðhalda stöðugum loftskiptum. Íbúi á Vesturlandi, sem daglega ekur göngin, sagði í samtali við ritstjórn að ryk og mengun hafi að sínu mati stóraukist síðustu vikur og mánuði og kallar eftir skýringum og hvort ekki væri ráð að nota blásarana í gangaloftinu meira. G.Pétur Matthíasson upplýsingafulltrúi Vegagerðarinnar segir í samtali við Skessuhorn að Vegagerðin hafi ekki breytt verklagi eftir yfirtökuna á göngunum, það sé ekki verið að nota blásara minna en var. „Þvert á móti hefur verið þrifið oftar inn í göngunum nú í haust en gert var áður, eða þrisvar,“ segir hann.

Meiri efnisflutningar

„Starfsmenn Vegagerðarinnar hafa þó orðið varir við aukin óþrif og þótt það sé ekki staðfest þá hefur verið áberandi meiri efnisflutningar í gegnum göngin. Rætt hefur verið við hlutaðeigandi og tryggt að ekki sé verið með óvarðan flutning í gegnum göngin sem er enda skylt samkvæmt lögum. Hinsvegar er einnig uppi grunur um að mikil óhreinindi komi af þessum flutningum frá hjólabúnaði vörubifreiðanna og hefur verið rætt um nauðsyn þess að hreinsunartæki þurfi við akstur út úr námum,“ segir G.Pétur.

Hann bætir við að tíðarfar í vetur hafi verið óvenjulegt sem gæti hafa leitt til aukinnar rykmengunar almennt og einnig að óvenjulegar vindáttir hafi takmarkað afkastagetu blásaranna. „Vegagerðin er meðvituð um þetta og við höldum áfram að gera okkar til að bæta ástandið,“ segir G.Pétur upplýsingafulltrúi Vegagerðarinnar.

Rykmengun hefur aukist í göngunum