Georg Kr. Lárusson, forstjóri Landhelgisgæslunnar, og Jón Tryggvi Helgason, framkvæmdastjóri ÍSMAR, undirrituðu nýverið samning um kaup Landhelgisgæslu Íslands á nýjum mælingabúnaði fyrir sjómælingaskipið Baldur. Annars vegar er um að ræða fjölgeislamæli sem ætlaður er til dýptarmæilnga fyrir sjókortagerð og hins vegar um jarðlagamæli ætlaðan til greiningar á jarðlögum hafsbotnsins. Að undangengnu útboði Ríkiskaupa var gengið til samninga við ÍSMAR, sem sérhæfir sig í sölu tækjabúnaðar til land- og sjómælinga. Stefnt er að því að nýju mælarnir verði tilbúnir til notkunar um borð í Baldri í lok febrúarmánaðar, að því er fram kemur í tilkynningu á vef Landhelgisgæslunnar.

Nýi fjölgeislamælirinn leysir af hólmi eldri mæli sem settur var undir Baldur árið 2005. Hann er af nýrri kynslæð tækja sem er bæði nákvæmari og betri en eldri gerðir. Hann nær niður á mun meira dýpi og heldur fullri þekjuvídd niður á meira dýpi. Afköst verða því meiri í dýpra vatni. „Þá hefur nýi mælirinn mjög nákvæma upplausn og eru möguleikar til að finna og greina hluti á hafsbotni því margfalt betri. Það gegnir veigamiklu hlutverki við hefðbundnar dýptarmælingar en ekki síður við leit á hafsbotni,“ segir á vef gæslunnar.

Jarðlagamælirinn er hins vegar búnaður um borð í Baldri og er hann keyptur vegna aðkomu gæslunnar að átaksverkefni atvinnuvega- og nýsköpunarráðuneytisins um kortlagningu hafsbotnsins næstu 10 til 15 ár, í samstarfi við Hafrannsóknastofnun. „Með jarðlagamæli er m.a. hægt að mæla þykkt setlaga á hafsbotni og eru það upplýsingar sem nýtast m.a. jarðvísindamönnum.“

: Baldur, sjómælingaskip Landhelgisgæslu Íslands. Ljósm. lhg.is.

Landhelgisgæslan kaupir ný mælitæki