Snæfellskonur töpuðu naumlega gegn Keflavík, 78-82, í stórleik sextándu umferðar Domino‘s deildar kvenna í körfuknattleik í gærkvöldi. Leikið var í Stykkishólmi og var þetta fyrsta tap Hólmara á heimavelli í vetur.

Gestirnir skoruðu fyrstu stigin en Snæfellskonur voru sterkari í fyrsta leikhluta og leiddu með fimm stigum að honum loknum, 20-15. Þær juku muninn í ellefu stig snemma í öðrum fjórðungi áður en Keflavík náði að svara fyrir sig og minnka forskotið í fjögur stig. Snæfell náði síðan góðum leikkafla undir lok fyrri hálfleiks og fóru með tólf stiga forskot inn í hléið, 42-30.

Jafnræði var með liðunum í upphafi síðari hálfleiks en eftir það voru Keflavíkurkonur sterkari. Smám saman minnkuðu þær muninn í tvö stig og leikurinn var hnífjafn síðustu mínútur þriðja leikhluta. Snæfell leiddi 57-55 fyrir lokafjórðunginn og leikurinn galopinn.

Snæfellskonur náðu fimm stiga forystu snemma í fjórða leikhluta en Keflvíkingar gættu þess að missa þær ekki lengra fram úr sér. Þær minnkuðu muninn í tvö stig og náðu að komast yfir þegar tvær mínútur voru eftir og stela sigrinum. Tilraunir Snæfells til að ná forystunni að nýju á lokamínútunum báru ekki árangur og því fór sem fór. Lokatölur í Stykkishólmi voru 78-82, gestunum í vil.

Angelika Kowalska var stigahæst í liði Snæfells með 27 stig og tók hún fimm fráköst að auki. Kristen McCarthy skoraði 25 stig, tók tíu fráköst og gaf átta stoðsendingar en aðrar komust ekki í tveggja stafa tölu á stigatöflunni.

Brittany Dinkins var allt í öllu í liði Keflavíkur og átti sannkallaðan stórleik. Hún skoraði 41 stig, tók 14 fráköst og gaf níu stoðsendingar. Salbjörg Ragna Sævarsdóttir var með 18 stig og Bryndís Guðmundsdóttir tíu stig og átta fráköst.

Snæfell hefur 22 stig í þriðja sæti deildarinnar, tveimur stigum á eftir Keflavík í sætinu fyrir ofan og toppliði KR, en Vesturbæjarliðið á þó leik til góða. Næst leika Snæfellskonur miðvikudaginn 23. janúar næstkomandi, þegar þær mæta Stjörnunni á útivelli.

Fyrsta tapið á heimavelli í vetur