Vestfjarðastofa fékk í nóvember síðastliðnum Gallup til að framkvæma viðhorfskönnun um afstöðu landsmanna til fiskeldis í sjó á Vestfjörðum. Þar kemur fram að 46,3% landsmanna eru jákvæðir gagnvart fiskeldi í sjó á Vestfjörðum en 29,6% eru neikvæðir. 24,1% eru hvorki jákvæðir né neikvæðir. Spurt var „Ertu jákvæð(ur) eða neikvæð(ur) gagnvart fiskeldi í sjó á Vestfjörðum?“ Tæplega 89% þátttakenda tóku afstöðu til spurningarinnar.

Mestur stuðningur við fiskeldi í sjó á Vestfjörðum var í Suðurkjördæmi þar sem rúmlega 62% voru jákvæðir en 20% neikvæðir. Minnstur stuðningur við fiskeldi í sjó reyndist meðal svarenda í Reykjavíkurkjördæmi suður þar sem tæplega 32% voru jákvæðir gagnvart fiskeldi í sjó á Vestfjörðum en 38% voru neikvæðir. Í Norðvesturkjördæmi voru tæplega 54% jákvæðir, tæplega 23% voru neikvæðir og tæplega 24% voru hvorki jákvæði né neikvæðir.

Gæði matvæla og vondir vegir

Í könnun Gallup var einnig spurt um gæði matvæla sem framleidd eru á Vestfjörðum. Spurt var: „Almennt séð, hversu góð eða slæm telur þú gæði matvæla sem framleidd eru á Vestfjörðum?“ Samkvæmt niðurstöðum könnunarinnar telja liðlega 89% landsmanna gæði matvæla sem framleidd eru á Vestfjörðum almennt góð en innan við 1% telur þau slæm og um 10% segja vestfirsk mætvæli hvorki góð né slæm.

Í könnun Gallup voru svarendur beðnir að nefna þrjú atriði sem þeim koma fyrst í hug þegar þeir heyra minnst á Vestfirði. Flestir nefndu erfiðar samgöngur eða vonda vegi en næst oftast kom Ísafjörður upp í hugann, í þriðja sæti var náttúrufegurð og í fjórða sæti fegurð. Vestfirsk fjöll voru í fimmta sæti, sjávarútvegur í því sjötta og laxeldi í sjöunda.

Um netkönnun var að ræða þar sem haft var samband við 1415 manns 18 ára og eldri af öllu landinu. Svöruðu 822 spurningunn og var þátttökuhlutfall því 58,1%.

Ný könnun um afstöðu til sjókvíaeldis