Rætt við Aldísi Ásgeirsdóttur, unga athafnakonu á Snæfellsnesi

Aldís Ásgeirsdóttir er ungur Grundfirðingur búsett í Stykkishólmi og vinnur í Snæfellsbæ. Hún er dóttir hjónanna Ásgeirs Ragnarssonar og Þóreyjar Jónsdóttur, fædd og uppalin í Grundarfirði þar sem hún hafði búið alla tíð, að undanskildum skömmum tíma sem hún bjó í Reykjavík, þar til hún flutti í Stykkishólm í vetur. Aldís er í dag 21 árs og þrátt fyrir ungan aldur hefur hún afrekað margt, svo sem að ljúka stúdentsprófi, læra förðunarfræði og naglaásetningu, ketilbjölluþjálfararéttindi, Crossfit Level 1 þjálfararéttindi, kaupa sér húsnæði, hefja háskólanám, auk þess að hafa séð um skipulagningu bæjarhátíðarinnar Á góðri stund í Grundarfirði þrjú ár í röð. „Ég hef prófað ýmislegt, en það er enginn önnur leið en að prófa sig áfram til þess að finna út hvað maður vill gera í lífinu,“ segir hún brosandi þegar blaðamaður Skessuhorns tók hana tali þar sem hún var í vinnunni í byrjun vetrar, en Aldís vinnur hjá fjölskyldufyrirtækinu Ragnari og Ásgeiri ehf.

Ætlar að verða kennari

Aldís hefur alltaf verið mjög virk í íþróttum og félagsstarfi og var ung farin að þjálfa hópleikfimi ásamt mömmu sinni sem rak líkamsræktarstöð í Grundarfirði. Hún æfði blak í nokkurn tíma og kynntist svo CrossFit fyrir ári síðan. „Ég hef alltaf haft mikla þörf fyrir að hreyfa mig og æfði ég hjá mömmu þar sem hún kenndi í hópleikfimitímum,“ segir Aldís. „Mamma kenndi hóptíma sem var alhliða þjálfun með lóðum, ketilbjöllum og æfingar með eigin líkamsþyngd. Þegar ég var 18 ára tók ég kennsluréttindi í því og fór að kenna með henni.“ Eftir að Aldís hafði lokið grunnskólanámi flutti hún til Reykjavíkur þar sem hún fór í Verzlunarskóla Íslands í eitt ár en fann fljótt að Reykjavík væri ekki fyrir hana. „Mér leiddist bara í bænum og ákvað að koma heim og kláraði stúdentsprófið hér í Fjölbrautaskóla Snæfellinga.“

Rætt er við Aldísi í jólablaði Skessuhorns.

„Það er enginn önnur leið en að prófa sig áfram til þess að finna út hvað maður vill gera í lífinu“