Á fundi sveitarstjórnar Borgarbyggðar fimmtudaginn 13. desember var samþykkt fjárheimild fyrir árið 2019 og fjárhagsáætlun fyrir árin 2020-2022. Þar er gert ráð fyrir að rekstarafgangur A og B hluta á næsta ári verði 146 m.kr. Áætlaðar tekjur A- og B-hluta fyrir árið 2019 eru 4.348 m.kr. og útgjöld áætluð 4.082 m.kr. að því er fram kemur á vef Borgarbyggðar. Þar af eru laun og launatengd gjöld A og B hluta 2.468 m.kr., annar rekstarkostnaður 1.466 m.kr. og afskriftir 147 m.kr. „Skuldir og skuldbindingar samstæður A+B hluta í árslok 2018 eru áætlaðar 4.729 m.kr. og 2.775 m.kr. í A-hluta. Munur á skuldum og skuldbindingum í samstæðu A+B hluta annars vegar og í A-hluta hins vegar skýrist aðallega af skuldum vegna Hjálmakletts, en þar koma á móti leigutekjur að hluta vegna leigusamnings við Menntaskóla Borgarfjarðar og síðan vegna viðbyggingar við Hjúkrunarheimilið Brákarhlíð en þar koma á móti að fullu leigutekjur frá ríkinu vegna greiðslu afborgana og fjármagnskostnaður,“ segir á vef Borgarbyggðar. Veltufé frá rekstri árið 2019 í A og B hluta er áætlað 420 m.kr. eða 9,7%. Afborganir langtímalána eru 238 m.kr. og áætlað er að taka langtímalán að fjárhæð 480 m.kr á árinu. Í árslok 2019 er áætlað að handbært fé verði um 288 m.kr.

Fjárhagsáætlun 2020-2022

Í Fjárhagsáætlun fyrir árin 2020-2022 er gert ráð fyrir að framlegð A og B hluta verði öll árin um 390 m.kr. og að veltufé frá rekstri verði á bilinu 420-455 m.kr. á ári. „Skuldahlutfall A+B hluta lækkar í 95% á tímabilinu og skuldaviðmið sk. reglugerð lækki um 65% í lok árs 2022. Það gefur til kynna áframhaldandi stöðugleika í fjármálum sveitarfélagsins sem gerir því fært að vinna áfram að bættu umhverfi fyrir íbúa þess,“ segir á vef Borgarbyggðar.

Búið er að draga úr framkvæmdum í fjögurra ára áætlun þar sem framkvæmdum við nýtt íþróttahús verður seinkað miða við áætlanir sem settar voru fram í fyrri umræðu sveitarstjórnar. „Stærstu framkvæmdir sveitarfélagsins eru viðbygging og endurbætur við grunnskólann í Borgarnesi, bygging leikskólans Hnoðrabóls á Kleppjárnsreykjum og endurbætur á húsnæði grunnskólans þar og að lokum lagning ljósleiðara um dreifbýli Borgarbyggðar. Áætlað er að þessum framkvæmdum verði að fullu lokið á árinu 2021.“

Sveitarstjórn Borgarbyggðar samþykkir fjárhagsáætlun