Þórunn Reykdal frá Arnheiðarstöðum í Hálsasveit

Áhugaljósmyndarar finnast víða og fór þeim fjölgandi eftir að stafræn ljósmyndatækni gerði slíkt áhugamál í senn ódýrara og auðveldara en þekktist á filmu- og framköllunartímabilinu. Þeir eru ekki endilega að ljósmynda í atvinnuskyni heldur drífur áhuginn og áhugamálið þá áfram. Mjög víða stunda áhugaljósmyndarar ómetanlega samtímaskráningu fyrir sín byggðarlög, skrá atvinnu- og menningarsöguna um leið og þeir safna í albúmið. Samtímaskráning af þessu tagi er oft vanmetin.

Hér á Vesturlandi eru fjölmargir sem stunda áhugaljósmyndun af kappi. Í jólablöðum Skessuhorns allt frá upphafi útgáfunnar hefur einn áhugaljósmyndari á Vesturlandi verið kynntur til leiks. Við köllum þetta fólk Sagnaritara samtímans; samtímasöguritara. Fólkið sem á í fórum sínum þúsundir eða tugþúsundir mynda frá liðnum árum. Myndir sem varðveita annars glötuð augnablik.

Fyrsta myndavélin var fermingargjöf

Þórunn Reykdal á Arnheiðarstöðum í Borgarfirði kemur úr Garðahreppi, síðar Garðabæ, en flutti í Borgarfjörðinn árið 1979 til að kenna við Héraðsskólann í Reykholti. Í Borgarfirðinum hefur hún búið síðan. Þórunn fékk sína fyrstu myndavél í fermingargjöf, það var Kodak Retinetta IA 35mm vél. „Jóhannes eldri bróðir minn kenndi mér öll helstu undirstöðuatriði eins og um ljósop og hraða,“ segir Þórunn. Hún notaði þessa vél fram á þrítugsaldur en keyptir sér þá aðra filmuvél. „Það var bara ódýr gerð af vél en ég lét hana duga í mörg ár. Fékk mér svo Canon 35 mm vél og notaði hana þar til stafræna tæknin tók við. Á þessum tíma tók ég mikið af slidesmyndum og þá helst af landslagi,“ segir Þórunn. „Ég er líffræðingur að mennt og er mikið náttúrubarn. Ég tók jarðfræðina aðeins með líffræðinni og hef alltaf haft gaman af jörðinni okkar og stórbrotna landslaginu. Mig hefur alltaf langað að mála eða teikna en ég hef ekki þolinmæði til þess. Ljósmyndirnar eru fljótlegri og það er eiginlega ástæðan fyrir þessum áhuga mínum,“ segir Þórunn.

Ríkulega myndskreytt viðtal við Þórunni Reykdal er að finna í jólablaði Skessuhorns.

Sagnaritari samtímans tekinn tali