Aldís Eiríksdóttir iðjuþjálfi er alin upp á Þingvöllum en starfaði lengst af sem grunnskólakennari við Kleppjárnsreykjaskóla

Aldís Eiríksdóttir er iðjuþjálfi á dvalarheimilinu Brákarhlíð í Borgarnesi. Hún hefur þó ekki alltaf verið iðjuþjálfi. Hún var lengst af grunnskólakennari í grunnskólanum á Kleppjárnsreykjum þar sem hún kenndi á yngsta stigi og sérhæfði sig síðar í sérkennslu með áherslu á lestrarkennslu. Aldís er hæglát kona og býr í Borgarnesi í dag ásamt manninum sínum Garðari. Hún tekur á móti blaðamanni Skessuhorns, tilbúin með heitt kaffi og svo segir hún sögu sína. Í kringum fimmtugt söðlaði hún um og skráði sig í iðjuþjálfarafræði við Háskólann á Akureyri. Hún segir að áratugurinn í milli fertugs og fimmtugs hafi verið ártugur mikilla breytinga og áfalla í lífi hennar. „Þetta var eiginlega hamfaraáratugur.“ Hún missti fyrri eiginmann sinn, Jón Kristleifsson, árið 2008 þegar hann lést úr hjartaáfalli. Hún stóð eftir ein með tvo syni þeirra báða á unglingsaldri. Skömmu áður hafði hún misst móður sína og mikil sorg hafði dunið yfir fjölskylduna vegna atburða í fjölskyldunni. Aldís segir að synir hennar Sigfús og Guðjón séu hennar mesta afrek og dýrmætastir í hennar lífi. Þeir stunda í dag báðir nám við Tónlistarskólann á Akureyri.

Rólegt uppeldi á Þingvöllum

Aldís er alin upp í burstabænum á Þingvöllum, þar sem pabbi hennar sr. Eiríkur J. Eiríksson gegndi þjóðgarðsvarðar- og prestsembætti. Lífið á Þingvöllum var rólegt yfir vetrartímann, en Aldís er fædd þar árið 1960. „Það var ekkert rafmagn, bara díselvél sem knúði allt saman. Það var ótrúlega afskekkt heima. Mamma sagði að það hefði verið eins og að fara mörg ár aftur í tímann þegar hún flutti þangað að vestan. Það var líka mjög oft ófært yfir vetrartímann,“ segir Aldís. Þau systkinin voru í skóla á Ljósafossi. Skólinn var heimavistarskóli og í minningunni er þetta yndislegur tími. Hún var í litlum bekk, ekki nema sjö nemendur í árganginum og hana kveið ekki fyrir því að fara í skólann í viku heimavist. Stundum var óvíst hvort börnin kæmust heim um helgar, því oft var ófært. „Uppvaxtarárin á Þingvöllum voru yndislegur tími og minningarnar ljúfar.“

Aldís stiklar á stóru um ævi sína í leik og starfi í jólablaði Skessuhorns.

Frá Þingvöllum í Borgarfjörðinn