Fjárhagsáætlun Akraneskaupstaðar fyrir árið 2019, sem samþykkti var á síðasta fundi bæjarstjórnar, gerir ráð fyrir um 424 milljóna króna afgangi af rekstri samstæðu A og B hluta bæjarsjóðs en afgangur A hluta 422 milljónir króna. Áætlað er að rekstrartekjur A og B hluta verði rúmir 7,6 milljarðar á næsta ári en rekstrargjöld rétt tæpir 7,5 milljarðar. Eftir fjármagnsliði og óreglulega liði er heildarafkoman áætluð 424 milljónir, sem fyrr segir.

Álagning útsvars verður óbreytt frá árinu 2018, eða 14,52% sem er hámarksútsvar og gjaldskrár hækka í samræmi við áætlaða vísitöluhækkun neysluverðs, eða 2,9%. Sorphreinsunar- og eyðingargjald verður óbreytt og álagningarprósentur fasteignaskatts lækka. Stofn íbúðarhúsnæðis lækkar úr 0,31% af fasteignamati í 0,2865% og stofn fyrirtækjahúsnæðis lækkar úr 1,62% í 1,581%. Lóðaleiga af nýjum og endurnýjuðum samningum verður 1,265% af fasteignamatsverði atvinnulóða og 0,3815% af fasteignamatsverði íbúðarhúsalóða. Er þetta annað árið í röð sem fasteignaskattur og lóðaleiga lækkar í bænum.

Áætlað er að handbært fé bæjarfélagsins í árslok 2019 verði 1,4 milljarður króna. Gert er ráð fyrir áframhaldandi lækkun skulda og áætlað að langtímaskuldanir við lánastofnanir lækki um 675 milljónir króna frá árslokum 2018 til ársloka 2022.

Samstaða í bæjarstjórn

Einhugur var við afgreiðslu fjárhagsáætlunar í bæjarstjórn. Í fundagerð má sjá að bæði meirihluti og minnihluti bæjarstjórnar lögðu fram bókun þar sem ánægju er lýst með fjárhagsáætlun ársins 2019 og áætlun áranna 2020 til 2022. Er það mat bæði meirihluta og minnihluta að reksturinn hafi verið góður undanfarin ár en jafnframt er lögð áhersla á að mikilvægt sé að viðhalda þeim árangri og halda vel á spöðunum í framtíðinni.

Sævar Freyr Þráinsson bæjarstjóri segir að fjárhagsstaða Akraneskaupstaðar sé sterk og stefni í góða rekstrarafkomu ársins 2019 líkt og undanfarin ár. Mikilvægt sé að viðhalda þeim árangri næstu ár en jafnframt treysta enn frekar grunntekjur aðalsjóðs sem þarf að styrkja á komandi árum. Gangi það eftir megi sækja enn frekar fram og efla grunnþjónustu við bæjarbúa. „Sóknarfærin okkar hér á Skaganum eru gríðarleg. Til að mynda tækifæri til að fjölga íbúum með að gera nýja íbúðarreiti byggingarhæfa og með lækkun álagningarstofna fasteignaskatts ætti það að takast vel til að laða að ný fyrirtæki. Þá er gert ráð fyrir uppbyggingu á fimm íbúðum í samstarfi við Þroskahjálp fyrir fatlaða einstaklinga og fimm íbúða á Dalbrautarreit í samstarfi við hússjóð Brynju. Íbúaþing um menntamál verður haldið á árinu þar sem meðal annars verður unnið að stefnumörkun til undirbúnings menntunar leik-, grunn- og fjölbrautarskóla vegna fjórðu iðnbyltingarinnar. Jafnframt er áhersla hjá bænum að efla þjónustu við bæjarbúa og viðhalda og bæta ferðamannasegla svo sem Guðlaugu og Vitasvæðið á Breið ásamt því að stíga fyrstu skref í uppbyggingu íþróttamannvirkja á Jaðarsbökkum. Tækifærin eru fyrir hendi á Akranesi og nú er okkar allra að nýta þá til fullnustu,“ segir bæjarstjórinn.

Afgangur frá rekstri og fasteignaskattur lækkar