Ævintýraheimur jólanna mun ráða ríkjum í Garðalundi á Akranesi næstkomandi laugardagskvöld, frá klukkan 19:00 til 21.00. Þar geta börn og fullorðnir komið saman, gengið um skógræktina og hitt fyrir alls kyns ævintýraverur sem verða á ferðinni. Mæðgurnar Margrét Blöndal og Sara Hjördís Blöndal skipuleggja viðburðinn ásamt Hlédísi Sveinsdóttur.

„Undirbúningurinn hefur gengið vel og það er gríðarleg eftirvænting í hópnum. Veðurspáin fyrir kvöldið lofar góðu, útlit er fyrir þurrt og stillt veður og þetta er allt að smella saman,“ segja þær Margrét, Sara og Hlédís í samtali við Skessuhorn. En hvernig viðburður er Jólaævintýrið í Garðalundi? „Þetta snýst um að stelast út eftir kvöldmat og upplifa ævintýri í skóginum. Gleðin nær síðan hápunkti þegar krakkarnir hitta jólasveininn og alls kyns verur aðrar; risa, álfa, tröll og jólaketti,“ segir Margrét. „Við höfum talað um að viðburðurinn sé fyrir alla sem vita að jólasveinninn er til. En Sara orðaði það eiginlega ennþá betur um daginn þegar hún sagði að Jólaævintýrið væri fyrir alla sem hafa einhvern tímann átt skó úti í glugga,“ segir Margrét og lítur á dóttur sína. „Út um alla skógrækt verður eitthvað óvænt og gleðilegt á ferð. Við erum búnar að staðsetja allt og ákveða eins og hægt er hvað hver á að gera, ramminn utan um ævintýrið er alveg klár,“ segja þær. „En það er ekkert eiginlegt handrit með nákvæmum fyrirmælum. Þetta er nokkurs konar gagnvirkt útileikhús,“ segir Sara. „Síðan er það undir hverjum og einum fullorðnum komið að matreiða ævintýrið ofan í börnin. Svara þeim spurningum sem þau kunna að hafa og leyfa sér að taka virkan þátt í upplifuninni með börnunum,“ segir Hlédís.

Opið öllum, endurgjaldslaust

Í upphafi viðburðarins verður kveikt á ljósunum hans Gutta, til minningar um Guðbjart Hannesson og munu þau loga út jólahátíðina. Barnabarn Gutta, Dagur Sölvi Ólafsson, tendrar ljósin og þar með telst Jólaævintýrið í Garðalundi hafið. Að því búnu fara börn og fullorðnir á ferðalag um ævintýraheim jólanna. Margrét, Sara og Hlédís mæla með því að fólk taki með sér vasaljós eða höfuðljós til að lýsa sér veginn en hafi símana ofan í vasa. Fólk er einnig hvatt til að klæða sig vel, bæði börn og fullorðnir, því desemberkvöld eru sjaldnast þau hlýjustu. Á meðan gestir ganga um svæðið geta börn og foreldrar komið smá yl í kroppinn með því að fá sér rjúkandi heitt kakó sem öllum stendur til boða á Jólaævintýrinu. „Það eina sem hver og einn þarf að gera er að koma með sinn bolla, því við erum umhverfisvænar og verðum því ekki með plastglös á svæðinu,“ segir Sara.

Aðgangur að viðburðinum og öllu sem honum fylgir er öllum opinn og án endurgjalds. „Okkur finnst mikilvægt að þessi viðburður standi öllum fjölskyldum á Akranesi til boða,“ segir Hlédís. „Til þess að svo megi verða höfum við notið stuðnings fyrirtækja og einstaklinga hér í bæ. Til dæmis mun Bifreiðastöð ÞÞÞ útvega sviðið, flottasta svið í heimi og Hlynur Sigurdórsson rafvirki sér um allt sem tengist rafmagninu. Húsasmiðjan leggur okkur líka lið sem og Íslandsbanki sem hefur staðið með okkur frá upphafi. Og svo ætlar Skaginn 3X að bjóða öllum upp á heitt kakó. Það væri ekki hægt að gera þetta án stuðnings allra sem hafa komið að Jólaævintýrinu með einum eða öðrum hætti. Fyrir það erum við óendanlega þakklátar,“ segja Margrét, Sara og Hlédís að endingu.

Jólaævintýrið í Garðalundi hefst sem fyrr segir kl. 19:00 næstkomandi laugardagskvöld, 15. desember. Innanbæjarstrætóinn mun aka frá Akratorgi kl 18:40 og koma við í Stillholti á leiðinni í skógræktina. Þeim sem ætla að mæta á eigin bíl er bent á að leggja við golfvöllinn og fara varlega þar sem búast má við því að mjög mörgum gangandi vegfarendum í nágrenni skógræktarinnar þetta kvöld.

Jólaævintýri framundan í Garðalundi