Í gær var Guðlaug við Langasand formlega tekin í notkun. Félagar úr Sjóbaðsfélagi Akraness voru fyrstir til að vígja laugina að aflokinni stuttri sjóferð. Meðan sjósundsfólkið gekk í sjóinn flutti Ragnar Sæmundsson formaður skipulags- og umhverfisráðs Akraneskaupstaðar ávarp og Sævar Freyr Þráinsson bæjarstjóri fór yfir sögu mannvirkisins, kostnað og fjármögnun. Loks var klippt á borða og laugin þar með formlega vígð.

Guðlaug er steinsteypt á þremur hæðum og er alls sex metra hátt mannvirki staðsett í grótvarnargarði neðan við stúku Akranesvallar og Aggapall. Efst er útsýnispallur sem gengið er útá beint af göngustíg sem liggur meðfram Langasandi. Undir pallinum er stjórnherbergi og heit laug samsíða honum sem vísar á móti sjónum með útsýni yfir Akraneshöfn, Faxaflóa og til Reykjaness. Önnur grynnri laug er á neðstu hæð mannvirkisins og nýtir hún yfirfallsvatn sem rennur úr pottinum fyrir ofan. Þegar laugin er opin er sífellt gegnumstreymi og því er ekki þörf á klór og öðrum hreinsiefnum. Á stórstreymi flæðir sjór í neðstu laugina. Á sandinum framan við mannvirkið hefur verið komið fyrir nokkrum stórum steinum en hlutverk þeirra er að draga úr sjógangi og álagi á mannvirkið.

Laugina hönnuðu Basalt arkitektar og Mannvit verkfræðistofa. Yfirverktaki við framkvæmdina var Ístak ehf. og Vélaleiga Halldórs Sigurðssonar ehf. var undirverktaki. Rafþjónusta Sigurdórs og Píplagningaþjónustan sáu um rafmagns- og vatnslagnir í lauginni og Trésmiðjan Akur gerði búningaaðstöðuna undir stúku Akranesvallar.

Verkefnið styrkt um 40% af byggingarkostnaði

Sævar Freyr Þráinsson bæjarstjóri fór yfir forsögu þess að ráðist var í framkvæmdina. Árið 2014 var minningarsjóði í nafni Jóns Gunnlaugssonar úrvegsbónda og Guðlaugar Gunnlaugsdóttur húsmóður frá Bræðraparti á Akranesi formlega slitið. Stjórn minningarsjóðsins ákvað að ráðstafa 14 milljónum króna til uppbyggingar á heitri laug við Langasand ásamt því að úthluta öðrum styrkjum til samfélagsins á Akranesi, alls 54 milljónum króna ásamt lóðum að verðmæti 66 milljónir. Tilgangur þessa sjóðs var að efla mannlíf og samfélag á Akranesi og veita ungum fátækum námsmönnum á Akranesi styrki til náms sem tengdist sjávarútvegi. Með breyttum aðstæðum og atvinnuháttum á Akranesi var ákveðið að leggja sjóðinn niður og ráðstafa stærstum hluta hans til málefna tengdum slysavörnum og samfélagsmálum á Akranesi. Í kjölfar styrkveitingarinnar var settur á laggirnar starfshópur til að útfæra verkefnið um uppbyggingu á heitri laug á Langasandi og skilaði hópurinn af sér tillögu á haustmánuðum 2015. Til viðbótar styrknum úr minningarsjóði Bræðrapartshjóna fékkst 30 milljóna króna styrkur úr framkvæmdasjóði ferðamannastaða. Styrkir þessir dekka tæplega 40% af byggingarkostnaði en annan kostnað við mannvirkið og búningsaðstöðu sem komið hefur verið upp undir stúku Akranesvallar greiðir Akraneskaupstaður. Fram kom hjá Sævar Frey að heildarkostnaður vegna byggingar og hönnunar Guðlaugar og búningaaðstöðu nemur 115-120 milljónum króna. Sagði hann að það væri um 4-8% umfram upphaflega kostnaðaráætlun við verkefnið. Nettókostnaður Akraneskaupstaðar verður því 71-76 milljónir króna.

„Guðlaug er frábær viðbót hér á Akranesi fyrir bæði heimamenn og gesti og erum við full stolts að standa hér í dag og vígja laugina,“ sagði Sævar. Tvímælalaust mun mannvirki þetta laða að ferðamenn en ekki síður auka umferð og notkun heimafólks á þeirri náttúruparadís sem Langisandur er.

Opin í fyrstu fjóra daga vikunnar

Guðlaug verður opin í vetur alla miðvikudaga og föstudaga frá klukkan 16-20 og laugardaga og sunnudag frá klukkan 10 til 14. Opnunartími getur tekið breytingum og eru gestir laugarinnar hvattir til að fylgjast með upplýsingum um rekstur laugarinnar á facebooksíðu Guðlaugar. Laugin er gjaldfrjáls.

Nánar í næsta Skessuhorni.

Guðlaug við Langasand tekin í notkun