Helga K Haug Jónsdóttir, sem leiddi lista Miðflokksins fyrir bæjarstjórnarkosningar á Akranesi í vor, hefur sagt sig úr flokknum. Með bréfi sem hún hefur sent forystu Miflokksins segist hún miður sín yfir hegðun manna í svokölluðu Klausturbarsmáli. Segir hún að þingmenn eigi skilyrðislaust að segja af sér þingmennsku og kalla til varamenn. Bréf Helgu er svohljóðandi:

„Ég er bara miður mín yfir hegðun manna og umræðunni síðustu daga. Eftir að hafa hlustað á upptökur af svokallaða Klaustursmáli þá get ég ekki annað en skorað á þá sem eiga hlut að máli að segja af sér þingmennsku og axla ábyrgð. Þetta er ekki það sem ég stend fyrir; kvennfyrirlitning og níð á minnihlutahópa. Þið ættuð að skammast ykkar fyrir talsmáta ykkar. Axlið ábyrgð strax. Svona eiga kjörnir fulltrúar ekki að haga sér. Það er til fullt af góðu fólki sem getur tekið við af ykkur. Þó þið haldið annað. Ég sé engar yfirbætur með hegðun ykkar. Ég persónulega og við öll höfum skaðast. Við lögðum mannorð okkar við þennan flokk og þessa forustu og ekki má gleyma fólkinu sem kaus okkur.

Hegðun manna á Alþingi er orðin þannig að allir ættu að líta í eigin barm. Virðing á Alþingi hverfur með þessum hætti og ekki var hún nú mikil fyrir. Þið þingmenn eigið að vinna fyrir fólkið í landinu og vera fyrirmynd þess. Ekki sitja í skotgröfunum og níða hvort annað. Og ekki batnar það þegar Borgarleikhúsð býður fólki ókeypis að koma og hlæja að gerendum og þolendum þessa máls. Er þetta það sem við ætlum að kenna börnunum okkar í komandi framtíð? Ég undirrituð segði hér með skilið við Miðflokkinn.

Fyrrum oddviti Miðflokksins á Akranesi fyrir síðustu sveitarstjórnarkosningar,

Helga K Haug Jónsdóttir.“

Oddviti Miðflokksins á Akranesi segir sig úr flokknum