Ruth Jörgensdóttir Rauterberg og Þorpið, frístundamiðstöð á Akranesi, eru handhafar Múrbrjótsins 2018, ásamt Geitungunum, vinnu- og virknitilboði í Hafnarfirði. Múrbrjótinn hljóta Ruth og Þorpið vegna framlags í þágu margbreytileikans og jafnra tækifæra, eins og segir í tilkynningu frá Þroskahjálp. Geitungarnir hljóta viðurkenninguna vegna framlags í þágu aukinna tækifæra fatlaðs fólks á vinnumarkaði.

Múrbrjóturinn var veittur í gær, 3. desember, á alþjóðadegi fatlaðs fólks og í tengslum við samkomu sem Ás styrktarfélag og Átak, félag fólks með þroskahömlun, héldu í tilefni dagsins og þess að félögin eiga 60 og 25 ára afmæli. Viðurkenningin dregur nafn sitt af því að hún er veitt þeim sem að mati Þroskahjálpar brýtur niður múra í réttindamálum og viðhorfum til fatlaðs fólks. Þannig þykir handhafi Múrbrjótsins hafa stuðlað að því að fatlaðir fái jöfn tækifæri til að verða fullgildir þátttakendur samfélagsins og til að lifa eðlilegu lífi til jafns við aðra. Verðlaunagripurinn er smíðaður á handverkstæðinu Ásgarði, þar sem fólk með þroskahömlun starfar.

Marbreytileiki og jöfn tækifæri

Sem fyrr segir hljóta Ruth og Þorpið viðurkenninguna vegna framlags í þágu margbreytileika og jafnra tækifæra. „Ruth Jörgensdóttir Rauterberg, þroskaþjálfi og aðjunkt við Menntavísindasviðs HÍ og frístundamiðstöðin Þorpið á Akranesi, hafa þróað tómstundastarf með margbreytilegum hópum sem byggir á samvinnu, þar sem allir geta tekið virkan þátt, tileinkað sér nýja þekkingu og öðlast ný sjónarhorn,“ segir í tilkynningu frá Þroskahjálp. Þar segir enn fremur að í frístunda- og forvarnarstarfi Þorpsins með börnum og ungmennum sé lögð áhersla á að mæta þörfum hvers og eins og miða starfsemina út frá þörfum samfélagsins hverju sinni. „Í öllu starfi Þorpsins er gert ráð fyrir margbreytileika mannlífsins og hver og einn getur fengið hvatningu og stuðning við hæfi í sínu tómstundastarfi,“ segir í tilkynningunni. Starfsemin hefur þróast á undanförnum árum. Samhliða þeirri þróun rannsakaði Rut frístundastarfið þar sem meginmarkmiðið var að skapa vettvang fyrir samvinnu barna og leiðbeinenda Þorpsins, í þeim tilgangi að þróa tómstundastarf með marbreytilegan hóp tíu til tólf ára barna. Meginniðurstaða rannsóknar Ruthar er að hugmyndafræði eins samfélags fyrir alla, þurfi að koma innan frá. Innleiðing á hugmyndafræðinni og tómstundastarfi með margbreytilega hópa sé námsferli sem byggi á samvinnu þar sem allir samstarfsaðilar taki virkan þátt, öðlist ný sjónarhorn og læri. Þróun í starfinu verði í gegnum samvinnu, þar sem allir leggi sig fram um að nýta tækifæri til þátttöku, takast á við hindranir, skilja hvorn annan og tileinka sér viðhorf og gildi og horfa á margbreytileikann sem tækifæri. „Eitt samfélag fyrir alla er hugsjón, tækifæri, verkefni og áskorun sem þarf frumkvæði, sveigjanleika, umburðuarlyndi, sköpunarkraft og hugrekki,“ segir í tilkynningu Þroskahjálpar. „Í kjölfar rannsóknarinnar hefur þessi hugsjón verið leiðandi í öllu starfi Þorpsins með það að markmiði að skapa samveru barna og ungmenna tilgang og rými, þar sem hver og einn fær tækifæri til þess að þróa sína hæfileika og iðka sín áhugamál með öðrum.“

Ruth og Þorpið handhafar Múrbrjótsins