Í ár hefur því verið fagnað með ýmsu móti að 100 ár eru liðin frá að hornsteinn var lagður að skólastarfi við Háskólann á Bifröst og verður botninn sleginn í afmælisárið með veglegri dagskrá á Bifröst í dag, mánudaginn 3. desember. Vilhjálmur Egilsson, rektor Háskólans á Bifröst, og Leifur Runólfsson, formaður stjórnar háskólans og hátíðarstjóri, taka á móti forseta Íslands klukkan 13 og á sama tíma opnar húsið en formleg dagskrá hefst klukkan 13:45. Hátíðin fer fram í Hriflu, hátíðarsal háskólans í aðalbyggingu.

Í dag verður einnig opnuð formlega klukkan 12:30 í Hriflu ljósmyndasýningin Samvinnuhús þar sem til sýnis verða m.a. ljósmyndir, gamlar og nýjar af öllum húsum og byggingum, þar sem Samvinnuskólinn var til húsa fram að árinu 1982 bæði í Reykjavík og á Bifröst. Einnig verða myndir af orlofshúsum í landi Hreðavatns og í nágrenni Bifrastar sem byggð voru á sínum tíma af félögum samvinnustarfsmanna. Sýningin inniheldur einnig sögulegan fróðleik um skólann og umhverfi hans í gegnum tíðina. Það er félagið Fífilbrekka sem stendur að sýningunni í samstarfi við Háskólann á Bifröst. Hönnuðir sýningarinnar eru: Ívar Gissurarson bókaútgefandi og Guðjón Hauksson grafískur hönnuður. Höfundur texta: Reynir Ingibjartsson.

Saga skólans

Árið 1918 var stofnaður í Reykjavík Samvinnuskólinn sem Háskólinn á Bifröst á rætur sínar að rekja til. Starfsemi hófst í desember en skólasetningin hafði þá dregist nokkuð vegna spænsku veikinnar sem geisaði í Reykjavík. Jónas Jónsson frá Hriflu var fyrsti skólastjóri Samvinnuskólans og skilgreindi hann skólann sem foringjaskóla og mótaði hann eftir fyrirmynd Ruskin College í Oxford þar sem Jónas hafði sjálfur verið við nám.

Skólinn í dag

Í dag er skólinn viðskiptaháskóli sem hefur það hlutverk að mennta ábyrgt forystufólk í atvinnulífinu og samfélaginu og útskrifa leiðtoga sem bera hag starfsmanna sinna og umhverfis fyrir brjósti. Fjölbreytt nám er í boði við viðskiptadeild og félagsvísinda- og lagadeild og er Háskólinn á Bifröst í fararbroddi í fjarnámi meðal íslenskra háskóla. Stundar megin þorri nemenda fjarnám við skólann en býr að því að sækja vinnuhelgar í hinu fallega umhverfi á Bifröst í Norðurárdal í Borgarfirði þangað sem skólinn var fluttur sumarið 1955.

Samhliða

Þann 30. nóvember 2018 komu stjórnarmenn úr Hollvinasjóði Bifrastar færandi hendi í heimsókn á Bifröst. Tilefnið var að „afhenda” skólanum, listaverk Ásmundar Sveinssonar, Lífsorku, eftir gagngera viðgerð. Formaður stjórnar Hollvinasjóðsins, Óli H. Þórðarson og Vilhjálmur Egilsson, rektor afhjúpuðu skiltið við stutta athöfn. Auk Óla voru stjórnarmennirnir Viðar Þorsteinsson, Þorvaldur T. Jónsson og Þórir Páll Guðjónsson viðstaddir afhendinguna, ásamt rektor og nokkrum hópi heimamanna. Að afhendingunni lokinni var boðið til hádegisverðar þar sem ávörp voru flutt, Vilhjálmur þakkaði m.a.stjórn Hollvinasjóðsins fyrir mikilsverðan stuðning við skólann, og Óli H. sagði m.a. að Hollvinasjóðsmönnum hafi þótt skorta orku í Lífsorkuna og því ráðist í þetta verkefni.

Hundrað ár í dag frá því lagður var grunnur að skólahaldi á Bifröst