Starfsmenn Spalar hafa nú greitt viðskiptavinum félagsins út verulegan hluta þeirra fjármuna sem þeir áttu á áskriftarreikningum sínum, það er andvirði ónotaðra ferða á veglykli og prentaðra afsláttarmiða. Þegar ríkið tók við rekstri Hvalfjarðarganga 1. október síðastliðinn áttu viðskiptavinir inni sem nemur 231 milljón króna.

„Viðskiptavinir Spalar eru hvattir til að skila veglyklum og afsláttarmiðum í síðasta lagi í dag. Undanfarna daga hefur verið umtalsverð ös á afgreiðslustöðum þar sem tekið er við þeim. Í desember er svo stefnt að því að ljúka uppgjöri við alla þá sem skiluðu lyklum og miðum fyrir lok nóvember. Jafnframt því mun starfsfólk Spalar leggja sig fram um að reyna að ná sambandi við þá sem ekki létu í sér heyra fyrir 1. desember en eiga inni á áskriftarreikningum hjá félaginu,“ segir í tilkynningu frá Speli.

Spölur á veglyklana og endurgreiðir viðskiptavinum sínum fyrir hvern lykil sem skilað er og innistæður á áskriftarreikningum að auki. Þeir sem af einhverjum ástæðum skila ekki veglyklum fá engu að síður innistæður sínar greiddar ef þær eru til staðar, en ekki skilagjald fyrir lyklana sjálfa. „Unnið verður að lokauppgjöri Spalar og frágangi að ýmsu tagi fram á árið 2019. Félaginu verður síðan slitið eins og fram hefur komið í fréttum.

Afgangur mun renna til sérstakra verkefna

Loks má geta þess að í afhendingarsamningi ríkisins og Spalar vegna ganganna er kveðið á um að ef einhverjir fjármunir verði eftir í fórum Spalar, þegar allur kostnaður hefur verið greiddur og hlutafé sömuleiðis, skuli þeir renna til „sérstakra verkefna í tengslum við rekstur Hvalfjarðarganga,“ eins og það er orðað.

Loka skilafrestur veglyklanna er í dag