Þegar aðventan gengur í garð stilla Akurnesingar viðtæki sín á FM 95,0 og hlýða á útsendingar Útvarps Akraness. Engin undantekning verður þar á að þessu sinni, því Útvarp Akranes fer í loftið á morgun, föstudaginn 30. nóvember, og stendur yfir þar til síðdegis fyrsta sunnudag í aðventu, 2. desember. Dagskráin er að vanda með fjölbreyttu sniði þar sem verður að finna efni fyrir alla aldurshópa, bæði tónlist og viðtalsþætti, sögulegt efni, afþreyingu, grín og gaman. Sent verður út frá húsnæði Símenntunarmiðstöðvar Vesturlands við Akratorg, eins og á síðasta ári og hefjast útsendingar kl. 13:00 að föstudeginum en kl. 9:00 að morgni laugardags og sunnudags.

Árviss menningarviðburður

Að vanda er það Sundfélag Akraness sem stendur að útsendingum Útvarps Akraness. Hafa þær verið árviss viðburður í menningarlífið bæjarins frá árinu 1988, hvorki meira né minna. Útvarpið fagnar því 30 ára afmæli um þessar mundir á 70 ára afmælisári Sundfélags Akraness. Trausti Gylfason, formaður sundfélagsins, segir að þessum tímamótum verði fagnað sérstaklega með bæði afmælisþætti og afmælisboði. „Vegna 70 ára afmælis Sundfélags Akraness verður boðið til kaffisamsætis í húsnæði Símenntunarmiðstöðvarinnar milli kl. 15:00 og 17:00 á föstudaginn, 30. nóvember. Stjórn sundfélagsins tekur á móti gestum og boðið verður upp á kökur og kaffi,“ segir Trausti í samtali við Skessuhorn. „Á sunnudaginn verður síðan útvarpað sérstökum afmælisþætti í umsjón Sturlaugs Sturlaugssonar, Ingunnar Ríkharðsdóttur og Guðmundar Páls Jónssonar, sem öll eru fyrrum formenn sundfélagsins. Þátturinn ber heitið Sund í 70 ár og ég hvet alla til að hlusta á þennan þátt og fræðast um sögu sundfélagsins,“ segir hann.

Tilhlökkun fyrir útsendingum

Formaðurinn segir einkum tvær ástæður fyrir því að sundfélagið hafi staðið að útvarpsútsendingum öll þessi ár. „Í fyrsta lagi er þetta ein helsta fjáröflunarleið sundfélagsins. Síðan höfum við í gegnum árin fundið hjá okkur hvöt til að taka þátt í menningarlífi bæjarins á þennan hátt og leggja svolítið meira til samfélagsins en eingöngu að kenna krökkum sund. Margir menningarþættir hafa ómað í Útvarpi Akraness í gegnum tíðina og megnið af þeim þáttum eigum við til. Það eina sem okkur vantar er tími til að geta gert þessa þætti aðgengilega öllum íbúum bæjarins,“ segir Trausti og kveðst fullur tilhlökkunar fyrir komandi útvarpsútsendingum. „Nú hafa aðstandendur útvarpsins unnið baki brotnu frá því í byrjun október við að undirbúa útsendingar og það er heldur betur tilhlökkun að fara í loftið. Ég verð mættur tímanlega niðureftir á föstudaginn til að fylgjast með þegar útsendingar hefjast,“ segir hann ánægður. „Þetta kallar á mikla en skemmtilega vinnu og hún er aðeins fengin með góðri samvinnu foreldra, þáttagerðarmanna og allra annarra sem að þessu koma. Síðan er vert að geta þess að við gætum aldrei staðið að þessum útsendingum án okkar frábæru tæknimanna, sem eru þeir Ólafur Páll Gunnarsson á Rás 2 og Ólafur Valur Þrastarson, sem stundum er kallaður Óli Ofur. Við stöndum í mikilli þakkarskuld við þá fyrir að að vera jafn viljugir og raun ber vitni að standa í þessu með okkur,“ segir Trausti Gylfason að endingu.

Útvarp Akranes í loftið á tvöföldu afmælisári