Nú í upphafi aðventunnar, eins og ár hvert, þá munum við Lionsmenn á Akranesi undirbúa útleigu okkar á ljósakrossum. Við höfum notið velvilja bæjarbúa og þeirra sem utan bæjarins búa í gegnum árin í þessu verkefni okkar. Í mörg ár höfum við getað keypt tæki og gefið sjúkrahúsinu á grunni velvilja þeirra sem leigja af okkur krossa í kirkjugarðinum og erum við afar þakklátir fyrir stuðninginn. Nú í vor gáfum við Heilbrigðisstofnun Vesturlands ristilspeglunartæki að verðmæti 4,9 milljónir króna.

Við verðum í kirkjugarðinum laugardaginn 1. desember frá kl. 11.00- 15.30, sunnudaginn 2. desember frá kl. 11.00 – 15.30 og laugardaginn 8. desember frá kl. 13.00-15.30. Verð pr. kross verður 7.000 krónur en hefur það verið 6.500 kr. undanfarin þrjú ár.

Lionsklúbbur Akraness hefur aðstoðað Íþróttafélagið Þjót við að halda bocciamót. Þá bjóðum við upp á fríar blóðsykursmælingar í samstarfi við Apótek Vesturland, Félag sykursjúkra á Vesturlandi og Lionsklúbbinn Eðnu. Við höfum einnig styrkt Mæðrastyrksnefnd Vesturlands og alþjóðleg verkefni Lionshreyfingarinnar. Að þessu sinni styrkjum við baráttuna gegn útbreiðslu mislinga og rauðra hunda í Indónesíu. Þetta er tveggja ára átak og stefnt að því að bólusetja um sjötíu milljónir barna. Hver bólusetning kostar einungis 100 kr. íslenskar. Þá höfum við styrkt verkefni sem kallast Orkester Norden, þar sem bestu ungu hljóðfæraleikarar á hverjum tíma fá tækifæri til að leika með þessari hljómsveit, sem er í raun og veru Sinfóníuhljómsveit unga fólksins á Norðurlöndum.

Þeir sem hafa áhuga á að ganga til liðs við Lionsklúbbinn er velkomið að hafa samband við félaga klúbbsins og fræðast um starfið hvenær sem er.

Með góðri kveðju,

Lionsklúbbur Akraness

Lionsmenn klárir í ljósakrossana