Út er komin ævisagan Stefán sterki, myndbrot úr mannsævi. Höfundur er Þórir Stephensen fyrrverandi dómkirkjuprestur. Fyrsta eintak bókarinnar var á mánudag afhent frú Vigdísi Finnbogadóttur fyrrverandi forseta Íslands en það var hinn ungi Stefánungur Stefán Björn Stephensen sem það gerði. Hann er sonarsonur höfundar og fjórði maður frá Stefáni sterka.

Myndbrot úr mannsævi fjallar um hinn litríka prest, Stefán sterka Stephensen (1832-1922) sem kenndur er við Mosfell í Grímsnesi þar sem hann þjónaði síðustu ár starfsævinnar. Stefán var einarður hugsjónamaður, dugnaðarforkur og slíkur kraftamaður að sögur af afrekum hans urðu landsþekktar. En um leið breyskur drykkjumaður.

Þau hjónin, Stefán og kona hans Sigríður Gísladóttir frá Kálfholti bjuggu við rausn og höfðingsbrag en mættu líka á langri ævi erfiðum sorgum í einkalífi þar sem þau máttu sjá á bak átta af tólf börnum sínum, þar af þremur í sömu gröf. Fjögur komust til fullorðinsára og urðu þrjár dætur þeirra bændur á Suðurlandi.

Stefán var sonarsonur Stefáns Stephensen amtmanns og náskyldur landsþekktum valdamönnum 19. aldar. „Um leið og hér er rakin lífssaga sveitaprests fáum við innsýn í stórfenglega ættarsögu sem spannar meira en bara sveitir í Árnessýslu. Sjálfur fór Stefán ungur úr föðurhúsum á Kálfafelli í Fljótshverfi til uppeldis á Ytri-Hólmi í Innri-Akraneshreppi. Þar bjó þá föðurbróðir hans, þjóðskörungurinn Hannes Stephensen, sem var einn af nánstu samverkamönnum Jóns Sigurðssonar forseta,“ segir í tilkynningu frá Sæmundi bókaútgáfu sem gefur út.

Höfundur bókarinnar, Þórir Stephensen fyrrverandi dómkirkjuprestur, er sonarsonur Stefáns sterka. „Í líflegri og ítarlegri frásögn kynnumst við framfaraviðleitni prestsins og ofsafengnum baráttuanda sem gat einnig beinst þvert á það sem flestir töldu þá til framfara. Sagan er sögð af hlutleysi og virðingu fyrir jafnt staðreyndum og sögupersónum. Myndbrot úr mannsævi er áhugaverð frásögn og um leið innlegg í þjóðarsögu þar sem við kynnumst löngu liðnu bændasamfélagi á umbrotatíma.“

Ævisaga Stefáns sterka komin út í bók