Fimm var í gær úthlutað verðlaununum „Icelandic lamb Award of Excellence 2018,“ sem er viðurkenning til framúrskarandi samstarfsaðila Icelandic Lamb í flokki handverks og hönnunar. Það eru: Anna Þóra Karlsdóttir listakona, Guðrún Bjarnadóttir hjá Hespuhúsinu í Andakíl, Hulda Brynjólfsdóttir og Tyrfingur Sveinsson fyrir Uppspuna, Philippe Ricart handverksmaður á Akranesi og Erla Svava Sigurðardóttir fyrir YARM.

Verðlaunin afhentu Icelandic Lamb við hátíðlega athöfn í listamiðstöðinni Mengi. Tilgangur viðurkenningarnar er að stuðla að auknum skilningi og þekkingu á gæðum íslensku ullarinnar og annarra sauðfjárafurða sem handverksfólk, listamenn og hönnuðir nýta sem hráefni í sköpun sína. Hún er hugsuð sem hvatning til frekari verðmætasköpunar, nýsköpunar og vöruþróunar úr íslenskum sauðfjárafurðum.

Icelandic lamb stóð að verðlaununum en markaðsstofan er í samstarfi við yfir 200 innlenda aðila; veitingastaði, verslanir, framleiðendur, afurðastöðvar, listamenn, hönnuði og fleiri. Tilgangur samstarfsins er að kynna íslenska sauðfjárafurðir, mat, handverk og hönnun fyrir erlendum ferðamönnum. Merki Icelandic Lamb er ætlað að undirstrika sérstöku íslenskra sauðfjárafurða með tilvísun til uppruna, hreinleika og gæða.

Tvö af Vesturlandi

Tveir af verðlaunahöfum eru frá Vesturlandi og bæði eru þau meðlimir í Ullarselinu á Hvanneyri. Í rökstuðningi dómara um þau segir meðal annars:

„Guðrún Bjarnadóttir hjá Hespuhúsinu hefur verið mjög ötul við að dreifa boðskap íslensku ullarinnar og tekið á móti mörgum hópum á vinnustofu sinni, enda er fólk mjög áhugasamt að fræðast meira um litunina á ullarbandinu og kíkja í pottana. Guðrún miðlar virkilega vel þekkingu sinni á hráefninu ásamt gæðum þess og möguleikum með náttúrulegri litun. Framsetning á efninu er fagleg og skemmtileg, og nýtir vel vefmiðla.“

Um listamanninn Philippe Richard segir m.a.: „Philippe er einn af okkar fremstu listhandverksmönnum og hefur starfað á Íslandi í áratugi, en er nú búsettur á Akranesi. Philippe er búfræðingur að mennt og hefur alltaf haft mikinn áhuga á handverki og listiðnaði. Framleiðsla vefstofunnar var þekkt um allt land og einnig erlendis. Philippe er mikilsvirtur listhandverksmaður og hefur einnig kennt á námskeiðum í mörg ár. Hann er mjög fjölhæfur, vinnur sín verk mest úr íslensku hráefni og þá helst úr íslensku ullinni. Hann vinnur handofnar værðarvoðir, sjöl og trefla úr íslensku bandi, með fjölbreyttum aðferðum, t.d. saluns-vefnaði og vaðmálsáferð, bæði fléttað vaðmál og víxlað vaðmál. Hönnun hans, aðferðir og tilfinning fyrir hráefninu þ.e. íslensku ullinni er einstaklega góð. Hann leggur mikla áherslu á að viðhalda gömlu íslensku handverki.“

Viðurkenningar fyrir samstarf á sviði hönnunar úr ull