Í samgönguráðuneytinu hefur verið undirritaður samningur við landshlutasamtök sveitarfélaga um níu verkefnastyrki sem veittir eru á grundvelli stefnumótandi byggðaáætlunar fyrir árin 2018-2024. Markmiðið með framlögum til sértækra verkefna sóknaráætlanasvæða er að tengja sóknaráætlanir landshluta við byggðaáætlun og færa heimafólki aukna ábyrgð á ráðstöfun fjármuna. Áhersla er lögð á að styrkja svæði þar sem er langvarandi fólksfækkun, atvinnuleysi og einhæft atvinnulíf. Verkefni sem hljóta styrk skulu nýtast einstökum svæðum eða byggðarlögum innan landshlutans, eða landshlutanum í heild. Íbúaþróun, samsetning atvinnulífs og atvinnustig og meðaltekjur var meðal þess sem lagt til grundvallar við mat á umsóknum.

Að þessu sinni var 120 milljónum króna úthlutað fyrir yfirstandandi ár til sértækra verkefna á sóknaráætlunarsvæðum. Alls bárust 26 umsóknir um styrki að fjárhæð tæpar 441 m.kr. Á Vesturland runnu tveir styrkir, hvor um sig að fjárhæð 15 milljónir króna. Annarsvegar til uppbyggingar Vínlandsseturs í Búðardal og hins vegar til Gestastofu á Snæfellsnesi. Það eru Samtök sveitarfélaga á Vesturlandi sem hljóta báða styrkina.

Í Vínlandssetri í Búðardal á að skapast valkostur í ferðaþjónustu sem gæti orðið drifkraftur í frekari uppbyggingu á svæðinu. Styrkurinn verður nýttur til að ljúka lagfæringum á húsnæði, viðbyggingu á veitingaaðstöðu og til að hanna sýningar.

Þá fær SSV styrk til að efla Gestastofu Snæfellsness. Gestastofan þykir gegna lykilhlutverki við eflingu ferðaþjónustu á sunnanverðu nesinu. Þar verður miðlað upplýsingum og þekkingu um Snæfellsnes til ferðamanna. Styrkurinn verður nýttur til endurbóta á húsnæði og lagfæringa á umhverfi þess.

Vínlandssetur og Gestastofa Snæfellsness fá verkefnastyrki