Hryllingsmyndahátíðin Frostbiter fer fram á Akranesi dagana 23. – 25. nóvember. Á hátíðinni verða sýndar 45 stuttmyndir og þar af 13 íslenskar stuttmyndir. „Við fengum sendar inn 270 myndir frá öllum heimshornum svo það var ekki auðvelt að velja úr,“ segir Ársæll Rafn Erlingsson í samtali við Skessuhorn, en Ársæll og Lovísa Lára Halldórsdóttir standa fyrir hátíðinni í samvinnu við Stefán Birgi Stefánsson sem sér um grafíska hönnun. Myndirnar verða sýndar víða um Akranes auk þess sem aðrir skemmtilegir viðburðir verða haldnir. „Við munum sýna myndir í Tónbergi, keilusalnum, vitanum og fleiri stöðum. Á Svarta Pétri verður hryllings pub quiz og á sunnudeginum verður þynnkusund í Bjarnalaug þar sem einnig verður sýnd mynd. Páll Óskar mun sýna hryllingsmyndir af super eight filmu í Þorpinu. Þetta verður mjög fjölbreytt og skemmtilegt,“ segir Ársæll.

Fær martraðir

Þetta er í þriðja skipti sem Ársæll og Lovísa halda hátíðina og stefnir í metfjölda í ár. „Fyrsta árið var alveg ágætlega sótt og í fyrra var mjög góð mæting. Við höfum heyrt að það ætli töluvert fleiri að koma í ár. Við erum enn að þróa hátíðina og er dagskráin í ár mjög skemmtileg,“ segir Ársæll. Ársæll og Lovísa eru bæði kvikmyndagerðafólk, Ársæll er leikari og Lovísa handritshöfundur og leikstjóri. „Lovísa er mikill hryllingsmyndaáhugakona og hana vantaði stað til að sýna hryllingsmyndir, en þær eru ekki teknar inn á hvaða hátíð sem er. Þannig spratt upp þessi hugmynd að halda hryllingsmyndahátíð,“ útskýrir Ársæll og bætir því við að sjálfur sé hann ekki mikill hryllingsmyndaaðdáandi. „Ég fæ martraðir,“ segir hann og hlær. „En ég er að læra að meta hryllingsmyndir og hef áttað mig á því að þessar myndir eru ekki bara til að hræða, það er meira bakvið þær.“

Hátíðin er styrkt af Sóknaráætlun Vesturlands og Akraneskaupstað og er aðgangur því ókeypis. „Styrkirnir og mikil aðstoð frá Akraneskaupstað gerir okkur kleift að hafa frítt inn og þannig kynna hryllingsmyndir betur fyrir fleirum,“ segir Ársæll. Áhugasamir geta fundið allar helstu upplýsingar á Facebook síðu Frostbiter og á www.frostbiter.is

Hryllingsmyndahátíðin Frostbiter framundan á Akranesi