Fjölmenni var í íþróttamiðstöðinni í Stykkishólmi síðastliðinn laugardag þegar fagnað var 80 ára afmæli ungmennafélagsins Snæfells. Ellert Kristinsson hélt hátíðarræðu í tilefni dagsins. Þá voru þeir Sigurþór Hjörleifsson, Gissur Tryggvason, Gretar Daníel Pálsson og Ingi Þór Steinþórsson heiðraðir með gullmerki Snæfells fyrir vel unnin störf í þágu félagsins.

„Þetta er í fyrsta skipti í sögu félagsins sem við afhentum gullmerki Snæfells,“ segir Hjörleifur K Hjörleifsson formaður Snæfells í samtali við Skessuhorn. „Sigurþór er annálaður frjálsíþrótta- og glímumaður sem hefur keppt fyrir Snæfell í áratugi, auk þess sem hann var formaður bæði frjálsíþróttadeildar og körfuknattleiksdeildar Snæfells um tíma. Gissur Tryggvason er einn af fótfráustu mönnum Íslands fyrr og síðar. Hann var formaður Umf. Snæfells í fjögur ár og formaður körfuknattleiksdeildar um tíma. Gretar hefur bæði verið formaður og gjaldkeri Umf. Snæfells auk þess sem hann hefur verð formaður og gjaldkeri körfuknattleiksdeildar. Hann hefur mikið beitt sér fyrir að fjármál félagsins séu í lagi. Þá var Ingi Þór heiðraður fyrir afburðagóðan árangur þau níu ár sem hann þjálfaði hjá Snæfelli. Þetta eru allt menn sem eiga mikinn þátt í velgengni Snæfells í gegnum árin,“ segir Hjörleifur. UMFÍ veitti því næst Eydísi Eyþórsdóttur, formanni frjálsíþróttadeildar, Hermundi Pálssyni, stjórnarmanni í körfuknattleiksdeild, og Páli Margeiri Sveinssyni, starfsmerki UMFÍ.

Að loknum ræðuhöldum sáu nemendur í 10. bekk um að kynna áhorfendur fyrir þeim fjölmörgu íþróttagreinum sem stundaðar hafa verið innan Umf. Snæfells í gegnum tíðina. Nemendur í 1.-4. bekk sýndu að lokum listir sínar í því helsta sem þau eru að gera á æfingum. Áður en gestir héldu svo heim á leið var boðið upp á heljarinnar afmælistertu og kaffi.

Ungmennafélagið Snæfell áttatíu ára