Þjóðgarðurinn Snæfellsjökull fékk á þessu ári úthlutað peningum úr svokallaðri Innviðaáætlun ríkisstjórnarinnar sem styrkja á uppbygginga á ferðamannastöðum. Pengingar fengust til ýmissa verkefna í Þjóðgarðinum, eins og rakið er hér að neðan. Meðal stærri má nefna uppbyggingu bílastæðis við gestastofu Þjóðgarðsins á Malarrifi, bætt bílastæði við Djúpalón og nýtt salernishús sem verður staðsett við Útnesveg ofan vegamóta að Djúpalóni. Auk þess fékkst fjármagn til þess að endunýja útsýnispall við Gatklett á Arnarstapa.

Gestastofan á Malarrifi var opnuð í júnílok 2016 en var áður á Hellnum. Fjöldi gesta sækir gestastofuna heim og er áætlað að á þessu ári komi þangað ríflega 70.000 manns. Samhliða opnun gestastofunar hefur Malarrif öðlast sess sem einn af stærri áfangastöðum í Þjógarðinum og nýta fjölmargir gesta Malarrif til útiveru og gönguferða. Í haust var hafist handa við stækkun og úrbætur við bílastæði gestastofunnar, enda var eldra stæðið of lítið. Á bílastæðinu verða sérstæði fyrir rútur, stæði fyrir hreyfihamlaða og hraðhleðslustæði auk fjölda almennra bílastæða. Jafnframt verða lagðar stéttir að gestastofunni og umhverfi hennar bætt. Arkitektastofan Landslag hannaði bílastæðin, en sú teiknistofa á einnig heiðurinn af stiganum á Saxhól sem hlotið hefur alþjóðleg hönnunarverðlaun. Framkvæmdaraðili við bílastæðið er B.Vigfússon ehf og er áætlað að jarðvinnu og sléttun bílastæðisins ljúki í nóvember á þessu ári og að bílastæðið verði malbikað og merkt á næsta sumri.

Hönnun stendur yfir á bílastæðinu við Djúpalón og hefjast framkvæmdir við þau næsta vor. Núverandi salerni á Djúpalóni verða fjarlægð og ný salerni reist ofan vegamótanna að Djúpalóni. Salernin verða því við þjóðveginn og nýtast fleirum sem um Þjóðgarðinn fara. Jafnframt verður sett upp bílastæði við salernishúsin.

Þessa dagana er verið að setja upp fjarskiptasendi við Purkhóla og lítið fjarskiptamastur verður reist vestan í Beruvíkurhrauni. Með þessari framkvæmd mun nær allur Þjóðgarðurinn komast í símasamband. Aðeins hluti Jökulhálsins verður án sambands. Verktakar eru að leggja rafstreng og ljósleiðara í vegöxlina frá Svalþúfu að sendistöðum og nýtur nýtt salerni ofan Djúpalóns góðs af því. Verður salernishúsið opið allt árið.

Þá stendur yfir hönnun á nýjum útsýnispalli við Gatklett á Arnastapa og stefnir í að hann verði reistur á vordögum næsta árs. Viðbótarfjármagn fékkst til landvörslu í Þjóðgarðinum á þessu ári og verður gestastofan á Malarrifi opin alla daga til áramóta, utan stórhátíðisdaga. Opnunartíminn verður frá klukkan 11:00 á morgnana til 16:00 á daginn frá og með 1. nóvember. Jón Björnsson þjóðgarðsvörður segir að það sé von stjórnenda Þjóðgarðsins að frekari viðbætur fáist til landvörslu í þjóðgarðinum á næsta ári og að opnunartími gestastofunnar verði tryggður alla daga. Stefnan sé að innan skamms verði landverðir ráðnir til heilsársstarfa og hvetur hann heimamenn til þess að sækja landvarðanámskeið og koma til starfa í Þjóðgarðinum, jafnt náttúru hans sem nærsamfélagi til heilla.

Ýmsar framkvæmdir í gangi í Þjóðgarðinum Snæfellsjökli