Haustfagnaður Félags Sauðfjárbænda í Dalasýslu verður nú um helgina, dagana 26. og 27. október. Fagnaðurinn er fyrir löngu orðinn árviss viðburður, nokkurs konar uppskeruhátíð sauðfjárbænda í Dölum og nágrenni. Það er stjórn FSD sem skipuleggur gleðina í sameiningu, með góðri aðstoð íbúa í Dölum.

Dagskráin verður að mestu með hefðbundnu sniði miðað við síðustu ár, en með einhverjum breytingum þó. Fyrsti dagskrárliðurinn er hrútasýning á Kjarlaksvöllum í hádeginu á föstudeginum. Þá verður sú breyting að sviðaveislan og hagyrðingakvöldið, sem fram fer að kvöldi föstudagsins, verður haldin í Dalabúð þetta árið, en þar hefur hún ekki verið haldin í mörg ár. Hagyrðingarnir sem koma fram verða Helgi Björnsson á Snartarstöðum, Einar Jón Geirsson í Búðardal, Jóhannes Sigfússon á Gunnarsstöðum og Pétur Pétursson á Akureyri. Veislustjóri verður Jón Kristófer Sigmarsson frá Hæli í Austur-Húnavatnssýslu. Þegar gestir hafa fengið fylli sína af lambasviðum og lausavísum mun hljómsveitin Meginstreymi stíga á stokk og leika fyrir dansi fram á nótt.

Laugardagurinn hefst á hrútasýningu og uppboði að Skörðum að morgni dags og eftir hádegi hefst dagskrá í reiðhöllinni í Búðardal. Þar verða sölu- og sýningarbásar. Íslandsmeistaramótið í rúningi hefst síðan kl. 14:00. Arnar Freyr Þorbjarnarson, ríkjandi Íslandsmeistari, hefur boðað komu sína og ætlar að reyna að verja titilinn. Samhliða dagskrá í Reiðhöllinni stendur stjórnin FSD fyrir vali á best ullarklædda einstaklingnum/hópnum sem jafnframt eru duglegir að hvetja rúningsmennina áfram. Verðlaun fyrir klæðaburðinn og stuðninginn verða veitt á grillveislunni sem hefst í Dalabúð kl. 18:00 um kvöldið. Þar verða einnig kynntir dómar af hrútasýningunum, veitt verðlaun fyrir bestu hrútana, bestu fimm vetra ærnar og bestu ljósmyndina tengda sauðfjárbúskap.

Að kvöldi laugardags verður síðan slegið upp stórdansleik í Dalabúð þar sem hljómsveitin Albatross mun leika fyrir dansi fram á rauða nótt.

Auglýsing um Haustafagnað Dalamanna

Haustfagnaður í Dölum um helgina