Í síðustu viku var tilkynnt um styrki til fimm íþróttafélaga og -sambanda til að standa fyrir verkefnum sem ætlað er að hvetja börn af erlendum uppruna til þátttöku í íþróttastarfi. Verkefnið er samstarfsverkefni Íþrótta- og Ólympíusambands Íslands og Ungmennafélags Íslands. Af félögunum fimm sem hljóta styrk eru tvö á Vesturlandi; Íþróttabandalag Akraness og Héraðssamband Snæfells- og Hnappadalssýslu. Hin félögin þrjú eru Íþróttabandalag Vestmannaeyja, Valur og Taekwondodeild Keflavíkur.

Margrét Lilja Guðmundsdóttir, sérfræðingur hjá Rannsóknum og greiningu, flutti erindi um hlutfall barna af erlendum uppruna í íþróttum. Kom fram í máli hennar að talið væri að um tíu prósent íbúa landsins væru innflytjendur en samanlagt væri fyrsta og önnur kynslóð innflytjenda um tólf prósent þjóðarinnar. Samkvæmt niðurstöðu rannsóknar sem lögð var fyrir 8.-10. bekk árið 2016 stunda 56% barna og ungmenna nær aldrei íþróttir ef þau koma frá heimilum þar sem engin íslenska er töluð. 46% stunda nær aldrei íþróttir meðal barna og ungmenna frá heimilum þar sem íslenska er töluð ásamt öðru tungumáli. Sagði Margrét sláandi hve stórt hlutfall barna og ungmenna af erlendum uppruna virtist ekki stunda íþróttir.

Þar að auki fluttu stutta fyrirlestra þau Maciej Baginski, körfuknattleiksmaður úr Njarðvík og Samar E. Zahilda, taekwondokona úr Ármanni. Maciej flutti fimm ára frá Póllandi með foreldrum sínum en Samar á foreldra frá Pakistan. Lýstu þau reynslu sinni og mæltu með því að foreldrar barna af erlendum uppruna skrái börn sín í íþróttir. Sögðu þau þátttöku sína í íþróttum hafa haft mjög jákvæð áhrif á líf sitt. En þátttaka í íþróttum væri ekki aðeins jákvæð fyrir börn af erlendum uppruna, heldur hefði hún einnig jákvæð félagsleg áhrif á foreldrana. Þeir geti eignast nýja vini og eflt félagsleg tengsl í gegnum íþróttastarf barnanna.

Hvetja börn af erlendum uppruna til að taka þátt í íþróttum