Snorrastofa heldur minningu Snorra Sturlusonar á lofti með ýmsu móti. Meðal annars hefur þess um árabil verið minnst, oft með minningarfyrirlestri, að hann var veginn í Reykholti 23. september 1241. Að þessu sinni flytur dr. Haukur Þorgeirsson fyrirlesturinn, „Sömdu Sturlungar þetta allt saman?“ þriðjudaginn 2. október næstkomandi kl. 20:30 í Bókhlöðu Snorrastofu. Þar gerir Haukur grein fyrir þeirri leit, sem engan enda virðist ætla að taka, að höfundi Íslendingasagna.

Í miðaldahandritum er engin þeirra eignuð höfundi með skýrum hætti en fræðimenn hafa með ýmsum rökum tengt þær við nafngreinda einstaklinga frá 13. öld. Sérstaklega hefur sjónum verið beint að Sturlungum. Egils saga hefur verið kennd Snorra Sturlusyni og Laxdæla saga Ólafi Þórðarsyni. Sturla Þórðarson hefur verið orðaður við Eyrbyggja sögu, Grettis sögu, Njáls sögu og Gull-Þóris sögu. Rökin fyrir þessu eru missterk. Í erindinu verður rætt um þau rök sem beitt hefur verið á þessu sviði og sérstaklega fjallað um um stórtækan samanburð á orðtíðni textanna. Stílmæling með aðstoð hugbúnaðar er aðferð sem hefur sannað gildi sitt við rannsóknir á höfundum en hún hefur einnig ákveðnar takmarkanir, sérstaklega þegar henni er beitt á texta frá miðöldum. Farið verður yfir nýlegar rannsóknir á sviðinu og reifað hvers konar framhaldsrannsóknir gætu varpað frekara ljósi á málin.

Haukur Þorgeirsson er rannsóknardósent við Stofnun Árna Magnússonar í íslenskum fræðum. Hann hefur doktorspróf í íslenskri málfræði og MS-próf í tölvunarfræði. Í rannsóknum sínum hefur Haukur fengist við forna texta frá málfræðilegu og textafræðilegu sjónarmiði.

Eftir fyrirlesturinn verður boðið til kaffiveitinga og umræðna. Aðgangur er kr. 500.

-fréttatilkynning

Minningarfyrirlestur um Snorra Sturluson