Laugardaginn 6. október verður blásið til árlegrar Sauðamessu í Borgarnesi í þrettánda skipti. Þá geta messugestir gert sér glaðan dag þar sem allir ættu að finna sér eitthvað skemmtilegt við hæfi. Hlédís Sveinsdóttir hefur verið á fullu að skipuleggja herlegheitin. „Þetta er allt saman að koma, og hátíðin er að taka á sig mynd,“ segir hún ánægð.

Hátíðin hefst strax um morguninn þar sem hlaupahópurinn Flandri býður hlaupaglöðum gestum að bætast í hópinn og hefja daginn á skokki. Á sama tíma verður Guðrún Daníelsdóttir með spinning fyrir þá sem kjósa frekar að hjóla. Aftur á móti fá allir duglegir, hlaupagarpar sem hjólakappar, lifrapylsu, slátur og mjólk að púli loknu.

Sérstök dagskrá fer fram á sviðinu í Skallagrímsgarði milli 14:00-15:30 þar mun meðal annars sérstakur hátíðarræðumaður ávarpar gesti. Hið vinsæla lærakappát verður að vanda í umsjón Jón Karls og Ómars Bjarka. „Það er Kjarnafæði sem leggur til lærin og Grillhúsið sem veitir veglega vinninga fyrir efstu þrjú sætin. Ég hvet alla líklega lærkappátsmeistara að senda skilaboð á Facebook síðuna okkar, Sauðamessa. Að auki tökum við öllum ábendingum fagnandi ef fólk veit um einhverja laumu-lærakappátsmeistara,“ segir Hlédís. Sömuleiðis verða veitt verðlaun fyrir fallegustu lopaflíkina og frumlegustu lopaflíkina og því eru Sauðamessugestir hvattir til að teygja lopann og mæta í sauðalitunum. „Svo bjóða Landnámsetur Íslands, Kræsingar og JGR heildverslun gestum og gangandi upp á rjúkandi landnámssauðasúpu í garðinum.“ Enn fremur verður settur upp Sauðamessumarkaður í Hjálmakletti. Þar verður í boði allskyns góss héðan og þaðan, nýtt og notað, ætt og ekki ætt.

Klukkan 16:00 býður Borgarverk upp á barna-fjölskylduball í Hjálmakletti. Hljómsveitin Meginstreymi leikur fyrir dansi og eru börn, unglingar, foreldrar og foreldrar þeirra hvött til að dansa af sér ullina. Klukkan 19:00 heldur knattspyrnudeild Skallagríms úti Kótilettumessu í Hjálmakletti. Þar geta gestir snætt sér að gúrme kótilettum í raspi, nóg verður af kartöflum, grænum baunum og íslensku smjöri. Vestlenska ballhljómsveitin Meginstreymi mun svo trylla lýðinn fram á nótt á Sauðamessudansleiknum í ár sem fram fer í Hjálmakletti.

„Ég finn fyrir mikilli stemningu og það verður eitthvað í boði frá morgni til kvölds. Þetta er tilvalið tækifæri fyrir bæjarbúa að bjóða brottfluttum Borgfirðingum aftur heim í héraðið. Þann 6. október verða rétt tíu ár frá því Geir Haarde, þáverandi forsætisráðherra, ávarpaði þjóðina í hruninu og sagði þau fleygu orð, Guð blessi Ísland. Við sem komum að Sauðamessunni höfum miklu meiri trú á hinu eiginlega fé. Hið jarmandi fé hefur verið til staðar frá landnámi og staðið af sér veður, vinda og hamfarir í aldir og það er ekkert sem breytir því. Því bjóðum við áhættusækna sauði og afturhaldssama æringja hjartanlega velkomna á Sauðamessuna í ár,“ segir Hlédís að endingu. Frekari upplýsingar um hátíðina má finna á Facebook undir Sauðamessa.

Styttist í Sauðamessu í Borgarnesi