Kristján Þór Júlíusson, sjávarútvegs- og landbúnaðarráðherra, hefur lagt fram á Alþingi frumvarp til laga um veiðigjald. Meginmarkmið frumvarpsins er að færa álagningu veiðigjalds nær í tíma þannig að gjaldtakan verði meira í takt við afkomu sjávarútvegsfyrirtækja hverju sinni og að stjórnsýsla með álagningu veiðigjalds verði einfaldari, skilvirkari og áreiðanlegri. Gjaldhlutfall veiðigjalds verður óbreytt frá gildandi lögum.

Helstu breytingar sem frumvarpið kveður á um eru þær að útreikningar verða færðir nær í tíma og veiðigjald ákveðið fyrir almanaksár hverju sinni. Ákvörðun veiðigjalds verður þannig byggð á árs gömlum gögnum um afkomu sjávarútvegsfyrirtækja í stað um tveggja ára líkt og verið hefur. Þá verður útreikningur veiðigjalds og álagning færð til Ríkisskattstjóra og veiðigjaldanefnd lögð niður. Ríkisskattstjóri getur nýtt villuprófun í skattframtölum og sannreynt með öðrum leiðum þau gögn sem aðilar skila til skatts.

Í frumvarpinu er lögð til sú breyting að hagnaður fiskvinnslu komi ekki til útreiknings veiðigjalds líkt og nú er. Núverandi fyrirkomulag hefur verið gagnrýnt, m.a. hefur verið bent á í þessu samhengi að fiskvinnsla sé ekki hluti af auðlindanýtingu. Þá verður tekið tillit til fjárfestinga í sjávarútvegi við útreikning á gjaldstofni veiðigjalds enda felast sameiginlegir hagsmunir ríkisins og útgerðar til langframa í öflugum fjárfestingum.

Þær breytingar sem gerðar eru á forsendum veiðigjaldsins leiða til þess að minni sveiflur verða á álagningu veiðigjalds, en það hefur verið ein helsta gagnrýnin á núverandi álagningu. Þannig verður meira samræmi á milli annars vegar afkomu sjávarútvegsfyrirtækja og hins vegar fjárhæðar veiðigjalds á hverjum tíma, segir í rökstuðningi ráðherra.

Frumvarp sem einfalda á álagningu veiðigjalds í sjávarútvegi