Tillaga Sigurðar Inga Jóhannssonar samgönguráðherra að samgönguáætlun 2019-2033 hefur nú verið gerð opinber. Samkvæmt henni er næstu fimmtán árum skipt niður í þrjú framkvæmdatímabil. Árin 2019-2023 er fyrsta tímabil, 2024-2028 annað og 2029-2033 þriðja tímabilið. Samgönguáætlun er þannig ætlað að verða hluti af; „heildstæðri samþættri stefnu í samgöngumálum, fjarskiptamálum, byggðamálum og málefnum sveitarfélaga og gerð í samræmi við samþykktar áætlanir á vegum Alþingis og ríkisstjórnar,“ eins og segir í upphafi þingsályktunartillögunnar.

Af verkefnum sem snerta íbúa Vesturlands sérstaklega er í samgönguáætlun lagt til að ráðist verði í uppbyggingu 9 kílómetra vegarkafla um Kjalarnes á fyrsta tímabili áætlunarinnar, árin 2019-2023. Áætlaður kostnaður er 3,2 millarðar króna. Á fyrsta tímabili verði einnig lokið við endurbætur á veginum yfir Fróðárheiði á Snæfellsnesi og áætlað að það kosti 250 milljónir króna. Ekki er gert ráð fyrir að ráðist verði í tvöföldun Hvalfjarðarganga miðað við fyrstu drög að fimmtán ára samgönguáætlun. Varðandi Vestfjarðaveg um Gufudalssveit er áætlað að vegaframkvæmdir þar muni kosta 6,7 milljarða króna jafnvel þótt ákvörðun um veglínu liggi ekki fyrir. Það verk er hins vegar sett í forgang í samgönguáætlun og gert ráð fyrir að komi til framkvæmda árin 2019-2023.

Á öðru tímabili samgönguáætlunar, árin 2024-2028 er gert ráð fyrir að farið verði í tvöföldun eða 2+1 veg á 20 kílómetra kafla frá Akrafjallsvegi í Borgarnes, en sú framkvæmd er talin kosta fjóra milljarða króna. Einnig verður Uxahryggjavegur frá Brautartungu að Kaldadal endurbættur á því tímabili, en það verk er talið kosta 1700 milljónir króna. Lagfæringar á 4,5 kílómetra kafla um Borgarnes, að andvirði 1400 milljónir króna, eru ekki á ætlun fyrr en á þriðja tímabili Samgönguáætlunar 2029-2033. Loks er fyrirhugað að gera endurbætur á 27 kílómetra kafla um Skógarströnd fyrir 1500 milljónir króna. Ekki verður byrjað á því verki á fyrsta tímabili samgönguáætlunar, en 450 milljónum ráðstafað í verkið árin 2024-2028 og 650 milljónum árin 2029-2033.

Auk sérgreindra verkefna sem hér hafa verið nefnd er í drögum að samgönguáætlun gert ráð fyrir framlögum til að bæta tengivegi landsins. 4,4 milljarðar fara í þann málaflokk á fyrsta tímabili, 6,6 milljarðar á öðru tímabili og 7,4 milljarðar á síðasta tímabili, alls 18,4 milljarðar króna á fimmtán árum. Auk þess á að breikka brýr og bæta hjóla- og göngustíga svo fátt eitt sé nefnt.

Sjá nánar umræður um samgöngumál á Haustþingi SSV sem fram fór í síðustu viku.

Fimmtán ára samgönguáætlun kynnt