Jókur – félag kvenna í atvinnurekstri á Akranesi og nágrenni var stofnað fyrr á þessu ári. Nafn félagsins er með vísun í tröllskessuna Jóku, en félagið er fyrir konur sem eru stjórnendur eða leiðtogar í sínum fyrirtækjum/stofnunum. Tilgangur félagsins er að skapa tengslanet fyrir konur á eða frá Akranesi og úr nærsveitum, styrkja þær í sínum stjórnunarstörfum, almennt að styðja konur og efla samstöðu kvenna í atvinnulíﬁnu. Fimmtudaginn 23. ágúst síðastliðinn var boðaður kynningarfundur í félaginu og ákveðið að fara í fyrstu vinnustaðaheimsóknina til að kynnast því sem konur í atvinnulífinu á Akranesi eru að gera. Var sú heimsókn til Ritari.is. Ingibjörg Valdimarsdóttir framkvæmdastjóri tók á móti konunum og bauð upp á léttar veitingar.

„Við skoðuðum húsnæðið og fengum síðan kynningu á starfsemi Ritara.is. Hjá fyrirtækinu eru í heildina tíu starfsmenn auk verktaka sem gegna m.a. úthringiþjónustu. Símsvörun er þeirra stærsti þátturinn í rekstrinum en á síðasta ári voru tæplega 180 þúsund símsvaranir eða um 500 símtöl á dag að meðaltali. Ritari er einnig með bókana- og bókhaldsþjónustu, vöktun samfélagsmiðla og netspjalls svo og aðra ritaraþjónustu. Ritari er sértækt fyrirtæki að því leyti að það býður þjónustu sem fáir aðrir eru með. Helstu samkeppnisaðilar eru Halló, Símaverið og Já.is. Það er virkilega frábært að geta státað að svona fyrirtæki hér á Akranesi. Við þökkum Ingibjörg Valdimarsdóttir kærlega fyrir móttökunar og veitingarnar,“ segir Karen Jónsdóttir formaður Jóku. Með henni í stjórn eru Steinunn Eva Þórðardóttir ritari, Anna Júlía Þorgeirsdóttir gjaldkeri, Kristbjörg Traustadóttir og Sandra Sigurjónsdóttir.

Jóka stendur fyrir mánaðarlegum fundum með dagskrá þar sem konum gefst kostur á að kynna sína starfsemi t.d. með fyrirtækjaheimsóknum. Þá verður boðið upp á aðkeypt námskeið/fyrirlestra um málefni sem gagnast í rekstri. Árgjald í Jóku er tólf þúsund krónur.

Næsti fundur Jóku verður í kvöld, mánudaginn 24. september á Café Kaju, og hefst klukkan 20.

Fyrsta heimsókn Jóku kvenna var til Ritari.is