Slysavarnafélagið Landsbjörg stendur um þessar mundir fyrir kynningar- og fjáröflunarátaki undir yfirskriftinni: „Þú getur alltaf treyst á okkur – nú treystum við á þig.“ Hápunktur átaksins er söfnunarþáttur í opinni dagskrá á Stöð 2 næstkomandi föstudag. Útsendingin hefst klukkan 19.25 og stendur fram á kvöldið.

Markmiðið með þættinum er að varpa ljósi á fjölbreytt og krefjandi verkefni Slysavarnafélagsins Landsbjargar. Sjálfboðaliðar eru til taks um allt land ef eitthvað bregður út af – allan sólarhringinn, alla daga ársins. Allir hafa þeir gengið í gegnum stranga þjálfun sem tryggir rétt og fumlaus viðbrögð sem geta skipt sköpum á ögurstundu. Tækjabúnaður og sérútbúinn bíla- og bátakostur er einnig forsenda þess að náist í tæka tíð til fólks í vanda. Þá þarf að tryggja samhæfð vinnubrögð og viðhalda þekkingu í hæsta gæðaflokki. Allt kostar þetta augljóslega mikla fjármuni,“ segir í tilkynningu.

„Félagið vonar að almenningur og fyrirtæki hrífist með og séu tilbúin að leggja félaginu lið. Hið umfangsmikla starf sem unnið er undir merkjum Slysavarnafélagsins Landsbjargar væri enda ómögulegt ef ekki væri fyrir almennan velvilja og stuðning.“

Bakverðir ein af meginstoðum björgunarstarfs

Í þættinum verur sérstök áhersla lögð á að bjóða almenningi að gerast Bakverðir Slysavarnafélagsins Landsbjargar. Bakverðir styðja við bakið á slysavarna- og björgunarstarfi í landinu með mánaðarlegum framlögum. Slíkur stuðningur skiptir félagið gríðarmiklu máli og tryggir meðal annars ákveðna festu í starfinu. „Allir geta orðið Bakverðir. Það eina sem þarf að gera er að fara inn á heimasíðu Slysavarnafélagsins Landsbjargar og skrá sig.

Landsbjörg í landsátaki – söfnunarþáttur í sjónvarpi í kvöld