Svala Svavarsdóttir hefur verið ráðin í starf verkefnastjóra hjá Samtökum sveitarfélaga á Vesturlandi, SSV. Svala var valin úr hópi fjórtán umsækjenda og verður starf hennar að hafa umsjón með Uppbyggingarsjóði Vesturlands auk þess sem hún mun sjá um fjármál og upplýsingamál SSV. Svala er fædd og uppalin í Reykjavík en búsett í Búðardal. „Foreldrar mínir eru báðir úr Haukadal svo Dalirnir voru alltaf mín sveit þegar ég var barn,“ segir Svala sem ætlaði sér þó aldrei að setjast að í Búðardal. „Ég flutti hingað þegar ég hóf nám í viðskiptafræði við Háskólann á Bifröst um áramótin 2003-2004. Ég ætlaði bara að búa hér á meðan ég væri í námi og flytja svo aftur í bæinn. Nú eru liðin tæp 15 ár og ég er hér enn,“ segir hún og hlær. Svala vann í Arion banka í Búðardal í sjö ár, fyrst sem fjármálaráðgjafi og svo sem þjónustustjóri. Fyrir tveimur árum var tekin sú ákvörðun að minnka útibú bankans í Búðardal og stytta opnunartíma. „Þá fækkaði verkefnum og átti að fækka starfsfólki og ég ákvað að hætta og stofna eigið fyrirtæki,“ Hún stofnaði fyrirtækið Gaflfell ehf. ásamt sambýlismanni sínum, Eyþóri Gíslasyni. „Eyþór er smíðaverktaki og ég rek bókhaldsþjónustu auk þess sem við erum með ferðaþjónustu þar sem við leigjum út tvær íbúðir í Búðardal undir nafninu Asubúð Apartments, en 99% af gestum okkar eru erlendir ferðamenn.“

Hefur ekki ákveðið að flytja úr Búðardal

Aðspurð segist Svala ekki vera á förum úr Búðardal þó nýi vinnustaðurinn sé í Borgarnesi. „Þetta er 80% starf og ég vinn fjóra daga í viku fyrir SSV. Ég legg upp með að keyra á milli þrisvar í viku og vera einn dag á skrifstofu hér í Búðardal. Ef veðrið ætlar eitthvað að setja strik í reikninginn er alveg svigrúm til að mæta því, en ég hef engar sérstakar áhyggjur af færð eða veðri. Þegar ég var í námi á Bifröst keyrði ég alltaf á milli og þótti það ekkert mál. Mér þykir gaman að keyra og get nýtt tímann í bílnum til að taka símtöl eða bara íhuga,“ segir hún. „Þetta verður ekkert mál.“ Aðspurð hvort hún komi til með að hætta með bókhaldsþjónustu hjá Gaflfelli segir hún svo ekki vera. „Þar sem nýja starfið er 80% get ég vel haldið áfram með bókhaldsþjónustuna og við erum búin að ráða starfsmann sem mun sjá um ferðaþjónustuna,“ segir Svala. „Eyþór mun svo bara halda sínu striki hjá Gaflfelli,“ bætir hún við.

Svala tók til starfa í byrjun mánaðarins og segist strax hafa mjög góða tilfinningu fyrir starfinu. „Hér starfar frjór og skemmtilegur hópur fólks og starfsandinn er mjög góður sem skiptir alltaf miklu máli. Verkefnin sem ég fæ að takast á við eru uppbyggjandi og skemmtileg, þau snúast um nýsköpun, menningu og að styrkja samfélagið okkar. Hér erum við að vinna að svo jákvæðum verkefnum og ég get ekki verið annað en þakklát fyrir að fá að taka þátt í slíkri vinnu,“ segir Svala að endingu.

Svala Svavarsdóttir er nýr verkefnastjóri SSV