Í gær fóru fram leikir í næstsíðustu umferð Inkassódeildar karla í fótbolta. Úrslit í þeim urðu þau að Skagamenn sigruðu Selfoss á Selfossi með þremur mörkum gegn engu. Á sama tíma tapaði Víkingur í Ólafsvík á heimavelli gegn Njarðvík 1-2. Þetta þýðir að það verður hlutskipti Skagamanna og HK að fara upp um deild, en Víkingur féll við þessi úrslit í fjórða sæti deildarinnar og spilar liðið því áfram í Inkassodeildinni næsta sumar. Selfoss er fallið í 2. deild og það verður annað hvort Magni eða ÍR sem fylgir.

Ein umferð er nú eftir af deildinni og verður hún spiluð næsta laugardag. Þá mæta Skagamenn Þrótti R á Akranesi en á sama tíma spilar HK, sem fyrir umferðina hefur stigi meira en Skagamenn, við Hauka á Ásvöllum. Hagstæð úrslit fyrir Skagamenn gætu þýtt að þeir verði í efsta sæti Inkassodeildarinnar eftir sumarið, en verða þá að treysta á sigur í sínum leik og jafnframt að HK annað hvort tapi eða geri jafntefli við Hauka. Víkingur Ólafsvík sækir Fram heim í Laugardalinn en úrslit í þeim leik hefur engin áhrif á veru liðanna í deildinni.

Býsna öruggur 3-1 sigur

ÍA, sem er í harðri baráttu við HK um efsta sæti deildarinnar, fór í heimsókn á Selfoss. Gestirnir komust yfir eftir rúmlega stundarfjórðungs leik með marki Jeppe Løkkegaard Hansen. Á markamínútunni, þeirri 43., tvöfölduðu þeir forskot sitt þegar Arnar Már Guðjónsson skoraði. Hrvoje Tokic og Kenan Turudija, í liði Selfoss, fengu að líta rauð spjöld með stuttu millibili um miðjan seinni hálfleik en þrátt fyrir það minnkuðu þeir muninn nokkrum mínútum síðar með marki Guðmundar Axels Hilmarssonar. Skagamenn skoruðu sitt þriðja mark í lok leiksins þegar Þórður Þorsteinn Þórðarson innsiglaði 1-3 sætan sigur gestanna.

Alltaf markmiðið

Jóhannes Karl þjálfari ÍA var að vonum afar sáttur eftir sigur sinna manna gegn Selfossi enda var hann að sigla liðinu upp í deild þeirra bestu. Í samtali við fotbolti.net sagði Jói Kalli: „Við sigldum þessu heim af fagmennsku og kláruðum þetta. Tryggðum okkar sæti í Pepsi sem var alltaf markmiðið.“ Til hamingju Skagamenn!

Jóhannes Karl Guðjónsson þjálfari Skagamanna er að vonum sáttur.

ÍA og HK lyftu sér upp í Pepsídeild