Gjaldtöku í Hvalfjarðargöng verður hætt föstudaginn 28. september næstkomandi. Göngin verða afhent Vegagerðinni til eignar og rekstrar sunnudaginn 30. september. Stjórn Spalar hefur tilkynnt hluthöfum félagsins um þessa ákvörðun sína. Þó er tekið fram að tímasetningin sé kynnt að þeim forsendum gefnum að Ríkisskattstjóri fallist á tiltekna meðferð á skattalegri afskrift ganganna og í öðru lagi að Samgöngustofa skili fyrirvaralausri úttekt á göngunum í aðdraganda eigendaskiptanna.

„Samgöngu- og sveitarstjórnarráðuneytið tilkynnti stjórn Spalar 7. maí að ríkið myndi ekki yfirtaka félögin sem eiga og reka göngin, líkt og rætt hafði verið um áður í samskiptum Spalar við fjármálaráðuneytið, fyrst á árinu 2009. Slík útfærsla á afhendingu ganganna hefur meðal annars áhrif á reikningshaldslegar afskriftir mannvirkisins,“ segir í frétt á vef Spalar. Það var síðan fyrr á þessu ár isem stjórn fyrirtækisins leitaði álits Ríkisskattstjóra á hvernig fara skyldi með skattalega afskrift ganganna og hugsanlega skattlagningu Spalar á árinu 2018. „Svar hefur ekki borist við erindinu en þess er vænst að viðunandi botn fáist í málið í tæka tíð svo unnt sé að afhenda göngin í lok september,“ segir á vef fyrirtækisins.

Veglyklar endurgreiddir

Eins og áður hefur komið fram mun Spölur á næstu mánuðum gera upp við viðskiptavini sína. Tekið verður við og endurgreiddir ónotaðir afsláttarmiðar og inneignir á áskriftarreikningum veglykla greiddar út. Þá verður greitt þrjú þúsund króna skilagjald fyrir veglyklana sjálfa. Viðskiptavinir hafa frest til 30. nóvember til að skila veglyklum og afsláttarmiðum. Nánari leiðbeiningar um greiðslu inneignar, skil veglykla og afsláttarmiða er að finna á vefsíðu Spalar, www.spolur.is.

Áskriftarsamningar Spalar eru um 20 þúsund og yfir 53 þúsund veglyklar eru í umferð. „Í ljósi þess að uppgjörsmálin skipta tugum þúsunda áskilur Spölur sér lengri frest en 30 daga til að afgreiða þau öll. Starfsfólk á skrifstofu félagsins vinnur að uppgjöri og frágangi til loka ársins og sumir fram á nýtt ár,“ segir á vef Spalar. Þá er þess getið að Spölur sendir ekki lengur reikninga til viðskiptavina vegna áskriftarferða. Þeir sem hafa nýtt alla inneign á áskriftarreikningi fá reikning í október fyrir ferðum septembermánaðar.

Gjaldtöku í Hvalfjarðargöng hætt 28. september