Eftir frestun í vor vegna veðurs er Flugsýningin í Reykjavík nú komin aftur á dagskrá og verður haldin á Reykjavíkurflugvelli á morgun, laugardaginn 8. september, og hefst sýningin kl 12. Að sögn Matthíasar Sveinbjörnssonar, forseta Flugmálafélagsins, er öllu því besta úr íslenska flugsamfélaginu til tjaldað á sýningunni í ár. „Sýningin verður með glæsilegasta móti. Tugir flugvéla af öllum stærðum og gerðum taka þátt í lofti og fjöldi véla verður á jörðu niðri sem gestir geta skoðað hátt og lágt. Þotur verða í loftinu, þyrlur, listflugvélar, fisflugvélar, svifflugur, einkavélar, fallhlífarstökkvarar, drónar og svo mætti lengi telja. Þetta verður flugveisla.“

Listflug

Listflug er áberandi á sýningunni að þessu sinni og verða fremstu listflugmenn landsins í vélum sínum tilbúnir að sína listir sínar yfir vellinum. Sumarið hefur verið fluginu gott og flugmenn því í góðri æfingu eftir flughátíðir víða um land. Matthías segir að hápunktur flugársins sé flugsýningin á Reykjavíkurvelli og þar verði aðeins boðið upp á það besta í listfluginu.

Þristurinn mætir

Spurður um áhugaverðar flugvélar á sýningunni nefnir Matthías DC-3 vélina Pál Sveinsson. „Þristurinn er kominn suður og tekur þátt í sýningunni. Það er einstakt að sjá hann fljúga og heyra í henni hljóðin sem allir Íslendingar þekkja frá fornri tíð.“ Þá verði einnig fleiri fornvélar á lofti.

Fjölskylduhátíð

Spurður um samsetningu gesta segir Matthías að allir mæti á flugsýningar en stór hluti fólks séu fjölskyldur sem vilji gera sér glaðan dag, fá sér ís og upplifa flugið í sinni tærustu mynd. „Börn eru sérstaklega velkomin. Þau gleyma aldrei sínum fyrstu flugsýningum og þarna fæðast draumar til framtíðar. Flugið heillar alla.“

Gestir mæti tímanlega

Sýningin er með stærri viðburðum í borginni á hverju ári og hafa gestir verið um 8-10 þúsund talsins. Í tilkynningu eru gestir hvattir til þess að mæta tímanlega en bílastæði eru við Háskólann í Reykjavík og í nágreni Reykjavik Natura hótelsins. Sýningarsvæðið sjálft er staðsett bakvið Hótel Natura.

Stærsta flugsýning ársins á morgun