Erling Garðar Jónasson lést á Landspítalanum í Fossvogi 30. ágúst síðastliðinn. Hann fæddist í Reykjavík 24. júní 1935. Erling Garðar var sonur hjónanna Jónasar Sveinssonar framkvæmdastjóra Dvergs í Hafnarfirði og Guðrúnar Jónsdóttur húsmóður. Hann ólst upp í Hafnarfirði í sex systkina hópi en kvæntist Jóhönnu Guðnadóttur, f. 1937, árið 1955 og áttu þau fimm börn.

Erling Garðar lauk sveinsprófi í rafvirkjun árið 1958, var sjómaður hjá Eimskip á árunum 1950–1954, rafvirki og verkstjóri hjá RARIK frá 1955 til ársins 1960 og um skeið ljósameistari í Þjóðleikhúsinu. Hann hélt síðan til frekara náms í Kaupmannahöfn og lauk þar prófi í raforkutæknifræði frá Köbenhavns Teknikum árið 1965. Erling Garðar hóf störf sem forstjóri RARIK á Austurlandi árið 1966 og gegndi því starfi fram á mitt ár 1990. Hann var síðan um þriggja ára skeið innkaupastjóri RARIK í Reykjavík áður en hann tók við framkvæmdastjórn umdæmis RARIK á Vesturlandi árið 1993 og starfaði þar til aldamótaársins 2000. Hann sat í stjórn RARIK á árunum 1979–1982.

Erling Garðar vann að fjölmörgum framfaramálum á Austurlandi og Vesturlandi eftir flutninginn í Stykkishólm, m.a. tengdum hitaveitu á lághitasvæðum og átti drjúgan þátt í heitavatnsleit og virkjun þess í Stykkishólmi. Erling Garðar gegndi ýmsum trúnaðar- og félagsstörfum. Hann var jafnaðarmaður og tók virkan þátt í pólitísku starfi, bæði á sveitarstjórnarstigi sem og á landsvísu. Hann var um tíma oddviti Egilsstaðahrepps og sat í bæjarstjórn Stykkishólmsbæjar sem oddiviti S-listans. Síðustu árin áttu samtök aldraðra hug hans allan; hann sat þar í stjórn og var formaður samtakanna í átta ár, eða til ársins 2015.

Útför Erlings Garðars fer fram frá Fríkirkjunni í Hafnarfirði fimmtudaginn 6. september, og hefst athöfnin kl. 13:00.

Andlát – Erling Garðar Jónasson