Fjölmenni var saman komið við íþróttahúsið við Vesturgötu á Akranesi núna klukkan 16:00. Þá tóku Guðmundur Claxton, formaður Fimleikafélags Akraness, Sævar Freyr Þráinsson bæjarstjóri og Marella Steinsdóttir, formaður Íþróttabandalags Akraness, fyrstu skóflustunguna að nýju fimleikahúsi á Akranesi. Þar með teljast framkvæmdir við bygginguna formlega hafnar.

Fimleikahús á Akranesi verður sambyggt íþróttahúsinu við Vesturgötu. Þar verður 1.640 fermetra fimleikasalur, með steyptri áhorfendastúku, stökkgryfjum, trampólínum með lendingu og fíbergólfi, svokölluðu „Fast track“ og öllum þeim búnaði sem þarf til fimleikaiðkunar við bestu mögulegu aðstæður. Auk nýbyggingar fimleikahúss verða núverandi búningsklefar íþróttahússins við Vesturgötu endurnýjaðir sem og anddyri og kennslurými þar sem frístund Brekkubæjarskóla hefur verið starfrækt.

Verktaki við byggingu fimleikahússins er fyrirtækið Spennt ehf., sem átti lægsta tilboð í verkið, samtals 607 milljónir króna.

Hópurinn sem var saman kominn við skólfustunguna.

Skóflustunga tekin að fimleikahúsi á Akranesi