Um það bil ár er síðan að bræðurnir Gunnar Smári og Jóhann Örn Jónbjörnssynir ásamt Sunnefu Burgess opnuðu CrossFit stöðina Ægi við Vesturgötu 119 á Akranesi. Stöðinni hefur verið vel tekin af bæjarbúum Akraneskaupstaðar og eru margir sem nýta sér þessa tegund líkamsræktar. Nú ætlar stöðin að færa út kvíarnar og stefnt er að því að opna útibú í Borgarnesi í október næstkomandi. „Við erum búin að handsala samning við eiganda hússins og erum núna á fullu í að gera það tilbúið til CrossFit iðkunar,“ segir Gunnar Smári fullur tilhlökkunar í spjalli við Skessuhorn. Um er að ræða 60 fermetra rými þar sem um tíu manns geta æft í einu. Rýmið er staðsett í bakhúsi í Brákarey. „Staðsetningin heillaði og það kom í rauninni lítið annað til greina, að ef við ætluðum að opna útibú í Borgarnesi þá væri það í Brákarey,“ bætir Gunnar Smári við.

Sjálfstæð starfsemi

Búið er að gera samning upp á eitt ár og stefnt er að því að bjóða upp á nokkur WOD (workout of the day) í viku undir leiðsögn þjálfara. Að auki er stefnt að því að setja upp aðgangsstýrikerfi þar sem meðlimir CrossFit Ægis hafa aðgang að aðstöðunni til að taka æfingu utan skipulagðra tíma. „Við notumst við Wodify til að birta nýtt WOD á hverjum degi og geta meðlimir okkar halað niður appinu á snjallsímana sína, tekið æfinguna og skráð árangurinn,“ útskýrir Gunnar Smári. „Það eru þó nokkrir Borgnesingar og töluvert af fólki úr sveitinni sem sækir í æfingar til okkar hingað á Akranes. Við teljum vera löngun fyrir CrossFit stöð í Borgarnesi og ætlum við í rauninni að sjá hvernig Borgarbyggð tekur við okkur og ef vel gengur þá munum við bæta við tímum með þjálfara og mögulega stækka stöðina.“

Ekki er komin formleg dagsetning á opnun útibúsins í Borgarnesi en eins og fram hefur komið er stefnt að því að opna í október. Hægt verður að fylgjast með gangi mála á Facebook-síðu CrossFit Ægis.

CrossFit Ægir mun opna útibú í Borgarnesi