Undirbúningur fyrir Hvalfjarðardaga sem fara fram helgina 24.-26. ágúst fer vel af stað og er allt að smella saman samkvæmt Ásu Líndal Hinriksdóttur skipuleggjanda hátíðarinnar. „Stefnt var á að hafa einungis dagskrá yfir laugardaginn en þar sem mikið er af flottum atriðum og góðu fólki sem vildi taka þátt þá dreifðist þetta yfir alla helgina sem er bara frábært. Aðal áherslan verður þó á laugardeginum,“ segir Ása Líndal í samtali við Skessuhorn. Dagarnir verða með svipuðu sniði og fyrri ár þar sem boðið verður uppá fjölbreytta og skemmtilega dagskrá fyrir alla fjölskylduna. Hægt er að sækja hátíðardagskrárliði víðsvegar um sveitina, þar á meðal tónleika í Hallgrímskirkju í Saurbæ þar sem íslenskar dægurlagaperlur verða sungnar af ungu og hæfileikaríku fólki sem á sterkar rætur í Hvalfjarðarsveit. Ágóðinn af þeim tónleikum rennur í Minningarsjóð Einars Darra.

Frítt verður í sundlaugina að Hlöðum á laugardeginum og mun Gunnar Sturla bjóða sundlaugargestum upp á lifandi tónlist. Í Steinsholti mun Hestaleigan Draumhestar teyma undir börnum, samsýning verður í stjórnsýsluhúsinu þar sem hjónin Anna G. Torfadóttir og Gunnar J. Straumland sýna listaverkin sín og fara með ljóð. Á Þórisstöðum verður sveitamarkaður, kaffi kot og ýmislegt fyrir yngstu kynslóðina. Hernámssetrið að Hlöðum verður með sögustund um „ástandið“. Kalastaðir bjóða gestum heim á myndlistarsýningu og bjórkynningu. „Í Álfholtsskógi verður boðið uppá kaffi og með því ásamt göngu um skóginn sem er virkilega skemmtilegt að koma í og er í raun falin perla,“ segir Ása. Hótel Laxárbakki verður með grill og Hlynur Ben heldur uppi stuðinu fram eftir kvöldi. Á sunnudeginum býður Vatnaskógur heim, þar verða hoppukastalar, bátafjör, tónleikar og kaffisala.

Undanfarin ár hefur verið ljósmyndasamkeppni á Hvalfjarðardögum og er engin undantekning þetta árið. Þemað að þessu sinni er mannlíf og náttúra og er öllum boðið að taka þátt. Heimafólk mun að auki etja kappi með að skreyta heimreiðar sínar þar sem sú best skreytta fær verðlaun.

„Í fyrra var hátíðin vel sótt og við erum að búast við svipuðum fjölda eða fleirum í ár. Það verður allavega nóg um að vera og allir ættu að finna sér eitthvað skemmtilegt að gera. Við vonumst til að sjá sem flesta um helgina og bjóðum alla hjartanlega velkomna á Hvalfjarðardaga,“ segir Ása Líndal að lokum.

Sjá nánar auglýsingu í Skessuhorni vikunnar.

Hvalfjarðardagar að hefjast