Síðastliðinn laugardag luku þrír Vestlendingar ofurhlaupinu Ultravasan-90, þar sem hlaupin er sama 90 km leiðin í Dölunum í Svíþjóð og gengin er í hinni árlegu Vasagöngu. Kristinn Óskar Sigmundsson í Borgarnesi var fljótastur þremenninganna, en hann lauk hlaupinu á 9:50:57 klst.

Vasagönguleiðin hefst við Sälen í Dölunum í Svíþjóð og endar 90 km síðar í bænum Mora. Í raun skiptist leiðin í átta áfanga á milli hefðbundinna áfangastaða Vasagöngunnar. Vasagangan á sér áratuga sögu, en fyrsta formlega keppnishlaupið á þessari leið var þreytt sumarið 2014. Þetta var því í fimmta sinn sem hlaupið var haldið.

Vestlendingarnir þrír voru einu Íslendingarnir sem þreyttu hlaupið að þessu sinni. Hugmyndin um þátttökuna kviknaði fyrir þremur árum, en enginn þremenninganna hafði áður hlaupið lengra keppnishlaup en Laugaveginn, sem er tæplega 55 km. Hlaupið í Svíþjóð hófst klukkan 5 á laugardagsmorgni og lá leiðin fyrst yfir fjalllendi frá Sälen til Smågan, sem er fyrsti viðkomustaðurinn á leiðinni. Þremenningarnir fylgdust að þennan fyrsta spöl, en þegar næsti áfangastaður, Mångsbodarna, var að baki, skildu leiðir smátt og smátt.

Kristinn Óskar Sigmundsson í Borgarnesi var sem fyrr segir fljótastur þremenninganna á 9:50:57 klst. Kristinn var um miðjan hóp á fyrstu viðkomustöðunum en fór eftir það fram úr hverjum hlauparanum á fætur öðrum og endaði í 258. sæti af 1.042 hlaupurum sem lögðu upp frá Sälen. Birkir Þór Stefánsson, bóndi og skíðagöngumaður í Tröllatungu á Ströndum, var næstur þremenninganna í 350. sæti á 10:19:29 klst. Birkir er reyndar ekki ókunnugur á þessum slóðum en hann hefur keppt þrisvar í Vasagöngunni og stefnir á fjórða skiptið á vetri komanda. Gunnar Viðar Gunnarsson í Borgarnesi var þriðji Vestlendingurinn í hlaupinu í 608. sæti á 11:41:56 klst. Allir voru þessir kappar því komnir í mark fyrir klukkan 5 síðdegis.

Hlaupararnir þrír og fylgdarlið þeirra voru sammála um að öll framkvæmd hlaupsins hefði verið til stakrar fyrirmyndar. Svíarnir eru heldur engir viðvaningar á þessu sviði, en fyrsta Vasagangan var haldið árið 1922. Framkvæmd viðburðar af þessu tagi er mun viðameiri en flestir gera sér grein fyrir og sem dæmi um það má nefna að á hverjum viðkomustað hafði stórum túnum verið breytt í bílastæði til að gera fólki mögulegt að fylgjast með hlaupurunum. Á viðkomustöðunum var hlaupurum einnig boðið upp á margs konar veitingar, enda eyða menn varla minna en 6.000 hitaeiningum í 90 km hlaupi. Orkuþörfin samsvarar því u.þ.b. fullu fæði í þrjá sólarhringa. Á matseðlinum var m.a. hin víðfræga bláberjasúpa, sem lengi hefur verið eitt af aðalsmerkjum Vasagöngunnar. Góður viðurgjörningur á leiðinni og góður undirbúningur sá til þess að Vestlendingarnir þrír voru allir þokkalega á sig komnir að hlaupi loknu. Sama var ekki hægt að segja um alla keppinauta þeirra, en af 1.042 hlaupurum sem lögðu upp frá Sälen um morguninn þurftu 64 að hætta einhvers staðar á leiðinni.

Sigurvegari hlaupsins að þessu sinni var 44 ára sænskur háskólakennari frá Uppsölum, Fritjof Fagerlund, en hann lauk hlaupinu á 6:01:56 klst. Það samsvarar meðalhraða upp á rétt um 15 km/klst, en á þeim hraða eru menn ekki nema 40 mínútur að hlaupa 10 km. Flestum finnst nógu mikil áskorun að gera það einu sinni á sléttri braut og fyrir „venjulegt fólk“ er það torskilið hvernig hægt er að hlaupa 90 km í einum spretti á slíkum hraða á misjöfnu undirlagi um hóla og hæðir. Tími Friðþjófs er sá næstbesti sem náðst hefur í hlaupinu frá upphafi, en brautarmet Jónasar Buud frá árinu 2015, 5:45:08 klst., stendur enn.

Vestlendingarnir þrír voru varla komnir í mark þegar bollaleggingar hófust um næstu ofurhlaupaáskorun. Vænta má frétta af þeim málum á næsta ári.

(Sjá fleiri myndir í Skessuhorni vikunnar)

Stefán Gíslason skráði

Þrír Vestlendingar í ofurhlaupi í Svíþjóð